Викторија Нуланд допатува во Москва: Кои пораки ги испраќа Русија

Москва не ја исклучува можноста за натамошно заострување на односите со САД, доколку не се направат дополнителни напори за нивно нормализирање, изјави денеска рускиот заменик -министер за надворешни работи, Сергеј Рјабков, по состанокот со американскиот заменик државен секретар Викторија Нуланд во Москва.

Разговорите со Нуланд во Министерството за надворешни работи траеја околу два часа, а Рјабков ги опиша како крајно отворени.

Разговорот беше корисен, но не постои согласност помеѓу позициите на двете страни. Американците немаат слух за нашата логика, нашите барања. Но, без оглед на тоа, разговорот беше корисен – рече Рјабков.

Тој додаде дека Русија не ја исклучува опцијата за замрзнување на работата на руската дипломатска мисија во САД, иако, како што не изјави, би сакала да го избегне тоа сценарио.

Во тој поглед, главното прашање беше функционирањето на дипломатската мисија и проблемот со издавање визи, а според рускиот дипломат не е постигнат напредок, но се планираат нови консултации на таа тема.

Рјабков, исто така, рече дека Украина не е на агендата на разговорите.

Нуланд рече дека разговарала со Рјабков за билатералните односи.

Мило ми е што повторно сум во Русија и се занимавам со нашите билатерални односи – им рече таа на новинарите по средбата.

Кремљ објави дека постои можност темата Украина да биде на агендата на разговорите меѓу Нуланд и Дмитриј Козак, заменик -шеф на администрацијата на претседателот на Русија.

Викторија Нуланд важи за една од најголемите специјалисти во Русија и земјите од поранешниот Советски Сојуз, а во претходната влада под Барак Обама, таа ја извршуваше и функцијата помошник државен секретар, но за Европа и Евроазија.

Нејзината посета на Москва доаѓа четири месеци по самитот на шефовите на држави, Владимир Путин и Џо Бајден во Женева.