Во пожарот кој што се случил утрово во осум часот во станбена зграда во Гостивар, едно дете починало, а една жена е во животна опасност пренесена во гостиварската болница.
Според очевидците и станарите на зградата од пожарот кој се случил утрово почнал да се шири чад, а станарите од зградата на улицата „Кеј Вардар“ веднаш почнале да се евакуираат.
Пожарникарите изнеле безживотно тело на дете и жена на 35-годишна возраст, а и двајцата веднаш биле пренесени во градската општа болница во Гостивар.
На ургентното одделение во болницата била констатирана смрт на детето која што неофицијално настанала поради задушување, додека пак жената е во животна опасност.
Дежурниот пожарникар Изет Изети во изјава кажал дека непосредно по пријавата за пожар на терен излегле со две пожарникарни возила и за половина час го локализирале огнот.
Според неофицијални информации, огнот прво се појавил во една од собите на станот во кој што престојувало повеќечлено семејство, а според станарите за спречување на ширењето на огнот и поголема штета, голема улога имала брзата интервенција на пожарникарите.
Во тек е увид на екипа од СВР Тетово и Јавен обвинител за да се констатираат точните причини кои што довеле до овој трагичен настан.
