На социјалните мрежи кружи видео од судир меѓу кинеските и индиските војници на спорната граница на Хималаите.
Се чини дека снимката покажува како двете армии се борат со долги стапови и тули и дава редок поглед на тензиите меѓу двете азиски суперсили.
Министерството за надворешни работи на Индија вчера потврди дека дошло до конфликт меѓу двете земји, што е прв ваков инцидент меѓу двете нуклеарни сили во последните две години. Министерството соопшти дека војниците од двете страни се здобиле со полесни повреди за време на инцидентот што се случил во петокот.
Иако видеото од соочувањето првпат се појави на социјалните мрежи само неколку часа по објавата на индиското министерство, и оттогаш стана вирално, не е јасно кој и кога го снимил. Си-Ен-Ен цитира изјава на офицер од индиската армија, кој бил запознаен со граничните конфликти меѓу двете земји, кој тврди дека видеото е снимено во индиската планинска држава Аруначал Прадеш на границата меѓу двете земји уште во септември 2021 година.
Слично тврдење на Твитер даде Сидхант Сибал, дописник на индиската телевизија WION и весникот ДНК.
“Виралното видео од конфликтот Индија-Кина е старо. Регионот Јангце е покриен со снег овој период од годината. Но, видеото дава добар увид во конфронтацијата. Она што се слуша на видеото, од индиска страна, е на пенџабски и вели: „Нема повторно да се вратат“ (по тепањето)“, напишал Сибал.
Во видеото, чија автентичност сè уште не е независно потврдена, војниците од двете земји се судираат на планински терен, опкружен со зелени ридови, очигледно недопрени од зимата. Иако се разделени со бодликава жица, се чини дека видеото покажува како индиските војници тепаат кинески војници со импровизирани оружја, кои изгледаат како дрвени палки и метални цевки. Во неколку случаи може да се забележат индиски војници како фрлаат тули или камења.
Многу од кинеските војници собрани од другата страна на жицата, исто така, изгледа дека држат долги цевки или стапови. На крајот бодликавата жица паѓа и индиските војници се движат напред, принудувајќи ги кинеските трупи да скокнат преку краток камен ѕид и да ја напуштат областа, со овации на индиската страна.
Спорната граница од 3.379 километри долго време беше извор на нетрпеливост меѓу Њу Делхи и Пекинг, а тензиите нагло ескалираа во јуни 2020 година кога најмалку 20 индиски и четворица кинески војници ги загубија животите во сличен судир. Индискиот министер за одбрана Рајнат Синг вчера ги обвини војниците на Кинеската народна ослободителна армија (ПЛА) дека се обидуваат да ја преминат границата меѓу двете земји.
„Престрелката што следеше доведе до физичка пресметка во која индиската армија храбро ги спречи Кинезите да преминат на наша територија и ги принуди да се вратат на своите позиции“, рече Синг, додавајќи дека на индиската страна немало сериозни повреди. Со оглед на изјавата од индиската страна, можно е вистинскиот конфликт да не се разликува многу од оној прикажан на видеото.
India china border situation#IndianArmy #IndiaChinaClash pic.twitter.com/SskIUAfiBR
— SUBHASH CHARAN (@Gadhwara27) December 14, 2022
Во својата претходна изјава, индиското Министерство за одбрана рече дека двете страни „веднаш се повлекле од областа“ и дека командантите на земјата одржале состанок за да разговараат за ова прашање „во согласност со мировните механизми“, пренесува CNN.
Кинеското Министерство за надворешни работи на вчерашната прес-конференција не го потврдиле директно инцидентот и изјавиле дека таквите работи се решаваат по дипломатски пат.
„Колку што знаеме, кинеско-индиската погранична област е стабилна и двете страни одржуваат непречена комуникација за прашањата поврзани со границата преку дипломатски и воени канали“, рече портпаролот Ванг Венбин на прашањето за инцидентот.
Индија и Кина влегоа во војна за нивните погранични области во 1962 година, на крајот воспоставувајќи договор. Сепак, двете земји не се согласуваат за точната локација на границата и често меѓусебно се обвинуваат дека ја минуваат или сакаат да ги прошират своите територии.
