Од излози испрскани со боја до навреди на патиштата – нападите врз руската заедница во Германија се зголемија од почетокот на војната во Украина. Дел од Русите кои живеат во Германија затоа организираа протести “против русофобијата”.
Демонстрациите во форма на конвој возила низ целата земја, дом на најголемата руска дијаспора во Европската унија, предизвикаа негативни реакции бидејќи многумина ги гледаат како израз на поддршка за руската воена агресија во Украина.
Речиси 400 казниви дела против Русите и 181 против Украинци се официјално пријавени во германската полиција од почетокот на руската инвазија на Украина во февруари.
Германија е дом на приближно 1,2 милиони Руси и 325.000 Украинци, а уште 316.000 бегалци пристигнаа од почетокот на конфликтот.
Стотици смртни закани се испраќаат до 40 -годишниот Кристијан Фрејер секој ден, заедно со фотографии од изгорени и осакатени трупови, откако тој помогна да се организира конвој од 400 возила во Берлин минатата недела.
Веб-страницата на неговата работилница за поправка на автомобили била хакирана, а нејзиниот рејтинг на интернет драстично паднал.
На двата проруски настани во Германија во недела се очекуваат околу 2.500 луѓе, а организаторите велат дека се борат против русофобијата.
На митингот во Франкфурт се очекува да дојдат 2000 луѓе, кој беше означен како настан “против малтретирање и дискриминација на жителите што зборуваат руски” и “против војна – за мир”.
Организаторите се надеваа дека на собирот ќе учествува конвој од 700 возила, но градот не го дозволи тоа.
Околу 600 луѓе со 350 возила се собраа северно во Хановер. Многу учесници во конвојот во исто време вееја и германско и руско знаме. Сепак, стартот беше одложен бидејќи полицијата одлучи дека не смее да се покриваат хаубата на автомобилите со знамиња.
На многу Германци им е непријатно со проруските конвои, а многумина се прашуваат дали ова е всушност тајна поддршка за војната. Сличен конвој на 3 април во Берлин вознемири многумина бидејќи се случи истиот ден кога се појавија наводите за руски воени злосторства во украинскиот град Буча.
Околу 850 луѓе веќе се собраа на антидемонстрации во Хановер. Неколку помали групи се собраа и во Франкфурт за да протестираат против руската инвазија. Многу учесници вееја транспаренти повикувајќи да и се застане на крај на Русија и стопирање на увозот на руски гас.
“Нема да го оставиме Франкфурт на оние кои ја поддржуваат војната”, порачаа група антидемонстранти.
