Властите во Рио де Жанеиро истражуваат како жител на градот успеал да прими пет дози од три различни вакцини против коронавирус.
Според официјалните податоци, човекот чие име не е соопштено почнал да се вакцинира во мај, потоа продолжил во јуни и во јули се додека не бил откриен од вработените на вакциналниот пункт во шестиот обид да прими вакцина.
Извештајот кој го објавија бразилските медиуми покажува дека човекот прво примил „Фајзер“ на 12 мај, потоа „Астра Зенека“ на 5 јуни. Следна била доза „Синовак“ на 17 јуни, а патоа упорниот Бразилец отишол по уште една доза „Фајзер“ на 9 јули и завршил со доза „Синовак“ на 21 јули.
Властите првично сметале дека се работи за пропуст во системот, но извештајот на Општинското здравствено одделение покажал дека не дошло до грешка.
Според извештаите, човекот се чувствува добро.
Информацијата е објавена во период во кој во Бразил има недостаток од вакцини и милиони луѓе чекаат да ја примат првата доза.
