Претседателката на Државната комисија за спречување на корупцијата (ДКСК), Билјана Ивановска, утрово гостуваше на „Утрински брифинг“, каде, меѓудругото зборуваше за работењето на Владата.
„Тоа што двајца генерални секретари на Влада се во судски процеси за корупција е лошо од една страна, бидејќи тоа значи дека се работело лошо, но од друга страна е добро бидејќи покажува дека тоа е откриено и процесуирано т.е. не било прикриено. На граѓаните особено им пречи неказнивоста на моќниците“, вели Ивановска.
Претседателката на ДКСК истакнува дека секоја влада досега практикувала да извлече средства од буџетот за да ги задоволи своите гласачи.
„Видовме договори за авторско дело, но немаше авторско дело. Имаше и авторски дела, но тоа беше по исклучок. Очекувам да се напуштаат старите лоши практики од претходната влада кога ќе дојде нова. Проблем е тоа што сите функционери си прават мали влади од своите кабинети. Тоа се премногу луѓе што се носат во министерствата однадвор во услови кога има доволен број вработени во самите министерства“, вели Ивановска за Утрински брифинг.
