Меморандумот за разбирање и соработка за производство на кинеска вакцина Синофарм во Србија беше потпишан денес во Белград меѓу Србија, кинескиот производител на вакцини и партнер од Обединетите Арапски Емирати.
Потпишувањето на Меморандумот е првиот конкретен чекор кон изградба на фабрика за вакцини во Србија, а според српската премиерка, Ана Брнабиќ целта е фабриката да се изгради до крајот на годинава.
Имаме амбициозни цели. Целта е да се изгради фабрика за производство на вакцини до крајот на годинава, а паралелно да се работи на полнење до крајот на годината и да има десет милиони дози вакцини што се наполнети во Србија, а веднаш после тоа да започнеме сеопфатно производство, рече Брнабиќ.
Таа посочи дека денес е важен ден за Србија, но и за регионот, бидејќи вакцината ќе ја имаме поблиску, ќе биде подостапна и ќе можеме да продолжиме да се бориме против пандемијата со корона вирусот.
Ова е почеток на поширока соработка меѓу Србија, Кина и ОАЕ во областа на биомедицината, биоинформатиката, употребата на вештачка интелигенција во фармацијата. Ова е продолжение на соработката што ја започнавме во тешкиот период на кризата со ковид, кога заедно создадовме две лаборатории за ПЦР тестирање, рече Брнабиќ.
Потпишувањето на Меморандумот е резултат на посетата на српскиот претседател Александар Вучиќ на Обединетите Арапски Емирати во март годинава, каде беше договорена соработка за изградба на фабриката.
Српската премиерка му се заблагодари на Синофарм за соработката за време на кризата, наведувајќи дека Србија купила четири милиони вакцини од таа компанија, а дека им биле доставени 4,2 милиони, бидејќи биле донирани 200.000 вакцини, а некои количини биле доставени порано.
Брнабиќ уште еднаш апелираше до граѓаните да се вакцинираат, додавајќи дека кинеските вакцини се одлични, безбедни и традиционални.
Кинескиот амбасадор во Србија, Чен Бо, изјави дека потпишувањето на Меморандумот е важен чекор напред во соработката за заедничко производство на кинески вакцини против ковид-19.
Таа исто така изјави дека Кина се обидува да го исполни ветувањето на претседателот Си Џинпинг дека кинеската вакцина против ковид 19 ќе биде глобален јавен производ и дека кинеската страна обезбеди и достави повеќе од 500 милиони дози и супстанции на вакцини во повеќе од 100 земји и меѓународни организации.
