Куба направи 5 вакцини против Ковид – повеќе од 90% ефикасни

Досега, престижниот биотехнолошки сектор на Куба има развиено пет различни вакцини за Ковид-19, вклучувајќи ги Abdala, Soberana 02 и Soberana Plus – за кои официјалните лица во земјата велат дека обезбедуваат повеќе од 90 проценти заштита од симптоматска инфекција со коронавирус, кога се даваат во три дози.

Земјата со околу 11 милиони жители сè уште е единствената земја во Латинска Америка и Карибите што произведе домашна вакцина против вирусот Ковид 19.

Работниците превезуваат пратка со кубанската вакцина Соберана Плус против Ковид-19, која ќе ја донира кубанската влада во Сирија, на меѓународниот аеродром Хозе Марти во Хавана, на 7 јануари 2022 година. ЈАМИЛ ЛАГЕ

Според американскиот CNBC, Куба вакцинирала поголем процент од своето население против коронавирус од речиси сите најголеми и најбогати нации во светот. Всушност, само Обединетите Арапски Емирати можат да се пофалат со повисока стапка на вакцинација.

Малиот карипски остров под комунистичката влада ја достигна оваа пресвртница со производство на сопствена вакцина, иако се бореше да одржи повеќе или помалку задоволително снабдување со храна во супермаркетите, поради децениското американско трговско ембарго.

„Тоа е неверојатен подвиг“, изјави Хелен Јафе, професор по економска и социјална историја на Универзитетот во Глазгов, за CNBC.

„Истражувачите на биотехнолошкиот развој не се изненадени од овој резултат, бидејќи тој не се случи од ведро небо, туку е производ на свесна владина политика на државни инвестиции во секторот, како во јавното здравство, така и во медицинската наука.

Досега, околу 86 отсто од кубанското население е целосно вакцинирано против Ковид-19 со три дози, додека други седум отсто се делумно вакцинирани против вирусот, наведено е во официјалната статистика составена од Our World in Data.

Овие бројки вклучуваат и двегодишни деца, кои почнаа да ја примаат вакцината пред неколку месеци.

Здравствените власти во земјата овој месец воведуваат дополнителни вакцини за целото население во обид да го ограничат ширењето на омикрон, многу заразна варијанта на вирусот.