Каква заштита обезбедуваат земјите во Европа од поскапувањето на струјата?

Многу европски влади, од кои некои се пред избори оваа година, инвестираа десетици милијарди евра во мерки за заштита на домаќинствата од рекордно високите цени на струјата, пишува „Reuters“.

Агенцијата, исто така, состави некои од политиките објавени од Обединетото Кралство и земјите-членки на ЕУ во овој поглед:

Реклама

Велика Британија

Во Британија, постои ограничување на цената за најкористените договори за електрична енергија од домаќинствата, но се очекува таа да се зголеми за околу 50 отсто во април.

За да ги ограничи негативните ефекти од ова, владата објави пакет мерки, вклучително и намалување од 200 фунти (263 долари) на сметките за електрична енергија, кои потоа ќе бидат вратени за пет години, како и попуст од 150 фунти на општинските даноци, за околу 80 проценти од домаќинствата во Англија.

Сепак, активистите кои се борат против енергетската сиромаштија велат дека со оглед на следното зголемување на плафонот на цените, кое се очекува во октомври, овие мерки нема да бидат доволни. Ја повикуваат Владата да направи повеќе – на пример да го отстрани ДДВ-то од сметките за струја.

Данска

Данските власти ја одобрија таканаречената „топлинска проверка“, што значи субвенции во вредност од 2 милијарди дански круни (299 милиони долари), кои ќе бидат исплатени на околу 419.000 од најпогодените домаќинства.

Европска комисија

Земјите на ЕУ генерално се одговорни за сопствените национални енергетски политики, а бриселските правила им дозволуваат да преземат итни мерки за заштита на потрошувачите од повисоки цени. Во октомври, Европската комисија објави збир на мерки што земјите-членки на блокот би можеле да ги користат без да ги прекршат правилата за конкуренција, вклучително и субвенции за помош на најсиромашните домаќинства. Други мерки вклучуваат финансирање активности за реновирање за да се намали потрошувачката на електрична енергија или исклучување на ранливите домаќинства од плаќање повисоки даноци за електрична енергија.

Франција

Франција вети дека ќе го ограничи зголемувањето на регулираните цени на електричната енергија на 4 отсто. За да помогне во постигнувањето на оваа цел, владата и нареди на енергетската компанија „EDF“, која е 80 отсто во државна сопственост, да продава повеќе евтина нуклеарна енергија на своите конкуренти.

Со новите мерки објавени по почетокот на украинската криза, поддршка на компаниите поради повисоките сметки за гас и струја, вкупниот износ на владиниот пакет се искачи на 25-26 милијарди евра, изјави министерот за финансии Бруно Ле Мер.

Германија

Владата на канцеларот Олаф Шолц одобри вкупно 4,5 милијарди евра даночни олеснувања оваа година, вклучително и попуст за луѓето кои секојдневно патуваат на работа за да им помогнат да се справат со зголемените цени.

Министерот за финансии Кристијан Линднер исто така сака да воведе привремени попусти на бензинот и дизелот, кои ќе чинат 6,6 милијарди евра за три месеци. Неговиот план наиде на отпор од еколошката организација „Greenpeace“, која не сака да ги поддржи владините субвенции за фосилни горива.

Грција

Грција потроши околу 2,5 милијарди евра за субвенции за струја и гас од септември, а минатата недела наведе детали за дополнителни 1,1 милијарди евра во шемата за помош, која вклучува попуст на горивата за домаќинствата со ниски приходи.

Италија

Минатата недела Италија одобри нов пакет за да им помогне на потрошувачите и компаниите да се справат со зголемените цени на електричната енергија.

Пакетот од 4,4 милијарди евра е уште еден чекор во намалувањето на цените на струјата и горивата, откако во јули минатата година беа издвоени околу 16 милијарди евра од буџетот во обид да се намалат сметките за струја што ги плаќаат претпријатијата и домаќинствата.

Бугарија

Бугарија ги замрзна регулираните цени на струјата и парното до крајот на март за да ги заштити домаќинствата.

Холандија

Холандија ги намали даноците за енергија за 8 милиони домаќинства во земјата.

Норвешка

Норвешка од декември ги субвенционира сметките за струја во домаќинствата и во моментов покрива 80 отсто од трошоците за електрична енергија над одреден праг. Претходно овој месец, владата предложи продолжување на шемата за една година до март 2023-та година.

Полска

Полска најави намалување на даноците за енергија, нафта и основни прехранбени производи, како и парични субвенции за домаќинствата. Владата, исто така, го прошири опсегот на регулираните цени на бензинот за домаќинствата и институциите како што се училиштата и болниците до 2027-ма година.

Шпанија

Шпанија намали неколку даноци за да ги намали сметките за потрошувачите, првично планирајќи да ги задржи стапките пониски до крајот на 2021-ва година. Сепак, владата потоа одлучи да ја продолжи мерката до крајот на јуни 2022-ра година.

Мадрид најави шема за директна помош и поволни заеми од 16 милијарди евра за да им помогне на компаниите и домаќинствата да ги издржат високите цени на енергијата, кои ја зголемуваат инфлацијата и го поттикнуваат социјалното незадоволство.

Шведска

Шведска ќе ги обештети домаќинствата најтешко погодени од поскапувањето на струјата. Владата за оваа намена издвои 6 милијарди шведски круни (636 милиони долари).

Реклама