Пензионираниот полициски полковник Миле Новаковиќ (69) наведува дека случајот со исчезнувањето на Матеј Периш (27) од Сплит е еден од најтешките и најкомплицираните случаи што ги видел во текот на неговата кариера.
Новаковиќ во својата 30-годишна кариера беше началник на криминалистичката полиција. Ја предводел полициската оперативна група Поскок, која во 2000 година уапсила членови на Земунскиот клан. Тој беше и еден од водечките оперативци во полициската акција Сабја во 2003 година, која уследи по атентатот на премиерот Зоран Ѓинѓиќ. Помина низ се и сешто, но во случајот со исчезнувањето на Матеј Периш многу работи не му се јасни.
Не го следам активно случајот бидејќи ги немам податоците што ги добивав додека бев началник. Не знам што да ви кажам освен дека треба да почекаме. Мислам дека моите колеги полицајци немаат друга опција освен да го бараат младиот човек во реката и да чекаат да се зголеми температурата на водата и да се обидат да го најдат телото, изјави Новаковиќ за хрватските медиуми.
Тој додава дека реката е брза и студена и дека не е невозможно да се најде телото дури кај Ѓердап.
Нема да го погребам младиот човек, но ништо друго не можам да заклучам по толку денови интензивна потрага. На таткото на Матеј Периш не му треба никаква детективска агенција или некои приватни истражители за да ја забрза или дознае вистината, бидејќи во случајот со исчезнувањето на неговиот син се прават сите напори и целта на државата Србија е успешно да ја заврши потрагата. Нема да ја грешам душата, јас не знам што се утврдиле моите колеги, ниту пак сакам накнадно да солам памет, но клучот за разрешување на мистеријата се контактите на Периш во Белград и неговите пријатели со кои дошол и останал овде, вели Новаковиќ кој сега има детективска агенција.
Тој наведува дека се уште не се одговорени многу прашања.
Најлесно е да се каже дека Матеј бил издрогиран, но зарем не би биле дрогирани и оние кои биле на маса со него таа вечер? А сепак, неговото трчање не е со некоја цел, туку е бесцелно и можно е да бил дрогиран, дури и многу сигурно дека бил дрогиран, вели тој и додава:
Мене не ми е вообичаено однесување некој да излезе на оваа белградска зима со маица, да трча напред и да се врати. До денес не знаеме што тоа го предизвикало. Дали отиде да се најде со некој затоа што имал договорено? Дали отиде да купи нешто, па имаше намера да се врати во ноќниот клуб? Тоа се уште не е разјаснето. Можеби се спушташе по скалите кон Сава да почека некој да дојде со глисер или со некој друг чамец по него или тој некого да дочека или да земе нешто. Не знам. Навистина. Би сакал тоа да го знаат моите колеги и сигурен сум дека ќе го утврдат тоа. И тешко ми е да кажам зошто се оди толку бавно, изјави Новаковиќ.
Нема да навлегувам во тоа кога неговите пријатели пријавиле дека е исчезнат, но многу ми е чудно што тие реагираа дури кога тргнаа од Готик во нивниот изнајмен стан во Ветерник. Тоа се неколку часа кога тие не се запрашаа, добро, каде е мојот пријател? Ако отиде со некоја девојка, знам јас за жените и за тие шеми, но колку што знам, тоа секогаш им се кажува на пријателите. Можеби не со кого да се оди, но каде се оди, на која адреса, тоа сигурно се кажува, заклучува Новаковиќ.
