Во емисијата „Жешко политичко лето“ на „Канал 5“ гостуваше министерката за образование Мила Царовска.
„Образовниот систем е подготвен за три сценарија – целосно физичко присуство, целосно онлајн или хибридно. Овие идеи се предложени и сите засегнати страни се известени. Владата во моментот има одлука да се започне со физичко присуство согласно нашите, но и искуствата на развиените земји“, изјави министерката Царовска.
„Нашите искуства кажуваат дека со 40 отсто од учениците во училница, минатата година немаше интерна трансмисија во училиштата. Целосно се почитуваа мерките и протоколите и институциите потврдија дека немаше ниту еден случај на интерна трансмисија“, изјави Царовска.
Таа исто така додала дека препораките на УНИЦЕФ и ОЕЦД се училиштата први да се отворат, а последни да се затворат за образовниот процес да тече непречено.
„Иако во нашата земја нема задолжителна вакцинација, нашите апели стигнаа до наставниците. Во образовниот систем вакцинирани се 69%, што е два пати повеќе од националниот просек. Тоа укажува на високата свесност на наставниците и очекуваме оваа бројка за брзо да порасне над 80 отсто“, изјави Царовска.
Министерката истакна дека се предвидени и исклучоци за отсуство од настава со физичко присуство. Тие се однесуваат на децата кои имаат хронични болести, деца чии родители или други членови на домаќинството имаат хронични болести, но има и од немедицински причини за што училиштето само ќе одлучува.
