На албанската телевизија "Top Channel" е објавено видео на кое е снимен македонскиот заменик министер за здравство, Асим Муса како прима мито.

Новинарот од истражувачката емисија „Фикс Фаре“ на албанската телевизија, пред заменик министер за здравство Муса се претставува како пациент на кој треба да му биде извршен оперативен зафат на простата.

По нивната средба во Институтот за нефрологија во Струга, заменик министерот и „пациентот“ се договараат кога да биде извршена операцијата, по што Муса бара 1000 евра мито и прима 50 евра аванс.

Лондонската полиција им испратила над 2 илјади пораки на лицата кои што албанската нарко-мафија ги снабдувала со кокаин, нудејќи им помош во врска со справувањето со зависноста од дрога.

Станува збор во најголем дел за вработени во лондонскиот финансиски центар, а нивните броеви полицијата ги пронашла кај два запленети мобилни телефони на албанската мрежа на организиран криминал. Како што пренесува „Тајмс“, од полицијата потоа ги контактирале „клиентите“ на нарко-бандата и им понудиле помош.

Во СМС пораките кои што од британската полиција им ги испратиле на контактите од запленетите телефони, било наведено дека дилерите се уапсени, а на корисниците им се нуди помош. На пораката имало и линк кој водел до интернет страница каде што се даваат совети и се нуди помош на тие што ја користат дрогата, а линкот бил посетен 1852 пати.

 

Лондонската полиција следела 12 Албанци кои што биле уапсени со 1,2 килограми кокаин чија што вредност се проценува на 144 илјади фунти. Кај уапсените биле пронајдени и лажни документи и готовина од 20 илјади фунти.

Во текот на последните 12 месеци, уапсените лица се осудени на затворски казни од 25 и 64 месеци.

Детективот Ли Џонсон за британските медиуми порача дека купувачите не се свесни дека со купувањето на кокаинот од албанската нарко-банда тие всушност финансираат тешки злосторства и ропство.

Американскиот и германскиот амбасадор наводно одбиле да се фотографираат со Аљбин Курти во канцеларија во која имало албанско знаме, јавува порталот Коссев.

Лидерот на движењето Самоопределување, кое победи на неодамнешните избори на Косово, во својата канцеларија и понатаму го има само албанското знаме и не го прифаќа официјалното знаме на Косово.

Во канцеларијата тој прима гости, одржува состаноци за кои информациите подоцна ги објавува на официјалните профили на партијата на социјалните мрежи, но американскиот и германскиот амбасадор одбиле да се фотографираат со Курти во канцеларијата во која се гледа националното албанско знаме.

Курти, чија партија победи на вонредните избори кои се одржаа во неделата, се сретна во понеделникот со американскиот амбасадор на Косово, Филип Коснет. Она што е впечатливо е што фотографијата е направена надвор од канцелариските простории каде што не се гледа албанското знаме.

Истото нешто се случило и со германскиот амбасадор на Косово Кристијан Хелт, на која се гледа Курти како го испраќа германскиот амбасадор на скалите пред седиштето на Самоопределување по состанокот.

Плоцијата потврди дека едно лице е приведено, по пукањето во Хале во кое загинаа две лица, а други се повредени. На еврејските гробишта е фрлена и рачна граната.

Видеоснимка од нападот е објавена на Твитер. На видеоснимката се гледа како напаѓачот излегува од автомобилот и почнува наоколу да пука со сачмарка. Снимката е објавена од регионалната радио телевизија МДР.

На видеоснимка се гледа дека по првиот истрел напаѓачот се сопнува наназад од интензитетот на оружјето.

На социјалните медиуми се појави слика од наводниот стрелец, но сè уште не е потврдена.

Две лица се убиени во нападот. Еден осомничен е уапсен, но полицијата соопшти дека други лица избегале од местото на настанот, па на локалното население им е препорачано да се сокријат на безбедно место до понатамошно известување.

Локалната железничка станица е затворена и специјализирани полициски единици се вклучени во потрагата.

Вчерашниот состанок на амбасадорите на земјите членки на ЕУ не донесе напредок во позицијата на Франција за почеток на преговори со Македонија и Албанија, велат француски дипломатски извори за МИА.

„Не очекуваме да има поместување најрано до самиот министерски состанок во вторник во Луксембург, ништо не е сменето во однос на минатата недела, одлуката треба да ја донесе претседателот Емануел Макрон“, објаснуваат за МИА дипломати присутни на вчерашниот амбасадорски состанок.

Дипломатите не ја потврдуваат информацијата дека Франција „не е оптимист“ за почеток на преговори со Македонија и Албанија, како што пренесоа некои француски медиуми.

„Не можеме да потврдиме таква информација бидејќи едноставно Франција за сега нема став, оттука не може да се каже дали е оптимист или не.

Според високи владини извори од земја членка на ЕУ кои биле во контакт со француската влада, „на Макрон не му пречи да биде изолиран по ова прашање во ЕУ“.

Преговорите помеѓу земјите членки на ЕУ сѐ повеќе се фокусирани на одвојување на Албанија и Македонија, посебно по ставот на холандската Влада и условите поставени од страна на Германија. Останува дека низа земји во ЕУ и натаму инсистираат двете земји да одат во пакет, од различни причини.

За некои земји членки проблематично е одвојувањето на Албанија „поради тоа што ќе се создаде перцепција дека се изолираат од преговарачкиот процес земји со мнозинско муслиманско население“, додека други сметаат дека во прашање е регионалната стабилност и стравуваат дека Тирана би „влијаела негативно“ во дијалогот Приштина – Белград ако биде блокирана.

„Иако на некои земји не им се допаѓа одвојувањето, доколку Франција застане зад таа позиција, најверојатно ќе прифатат, подобро една отколку ниедна земја да започне преговори, како и да е сѐ ќе зависи од Макрон“, објаснува висок дипломат од земја членка на ЕУ за МИА.

Позицијата на холандската Влада во секој случај ги охрабри поддржувачите на проширувањето, но сѐ уште не е сигурно дека одлука ќе биде донесена во вторник. Зависно од динамиката на разговорите на министерскиот состанок во Луксембург ќе се знае дали е потребно да им се остави крајната одлука на шефовите на држави и влади на Самитот, кој ќе се одржи два дена подоцна во Брисел.

Пратеничката Фросина Ременски во моментот е во Кривичниот суд, пред судија на претходна постапка, дознава неофицијално „Фокус“.

Судијката на претходна постапка треба да одлучи дали ќе и одреди некоја од мерките на претпазливост, кои ги бара обвинителката Вилма Русковска, бидејќи од вчера и Ременски е осомничена во проширената истрага за „Рекет“’.

Денес во судот треба да се појават и таткото на Боки 13, Миле Јовановски, како и неговата асистентка.

За Јасна Мандиќ пак синоќа беше донесена одлука за куќен притвор.

Фросина Ременски, Јасна Мандиќ, таткото на Боки 13, Миле Јовановски, асистенткта на Јовановски во „Меѓународниот сојуз“ и самиот Бојан Јовановски се петтемина осомничени за перење пари во невладината „Меѓународен сојуз“ – дознава ТВ 24 од извори во истрагата.

Потпретседателката на Собранието Фросина Ременски, дознава НОВА од извори во истрагата, е опфатена со проширената истрага против нови четири лица осомничени за перење пари, измама и помагање во измама, во делот на исплатата на средства за наводната изградба на старечки домови на сметката на Меѓународниот сојуз на Бојан Јовановски.

Како што се наведува во соопштението од Основното јавно обвинителство, „едно од осомничените лица како функционер, заедно со првоосомничениот присуствувало на средбите организирани од првоосомничениот, при што го искористило својот углед и авторитет и оштетените стекнале впечаток дека зад понудените проекти стои извршната власт“.

-Останатите осомничени лица со умисла му помагале на првоосомничениот во извршувањето на кривичните дела изготвувајќи договори, подигнувајќи ги уплатените средства и уплаќајќи средства на други правни лица по основ на позајмица или донација. Воедно, едно од осомничените лица како функционер, заедно со првоосомничениот присуствувало на средбите организирани од првоосомничениот, при што го искористило својот углед и авторитет и оштетените стекнале впечаток дека зад понудените проекти стои извршната власт, соопшти обвинителството.

Ременски беше почесен претседател на Меѓународниот сојуз на чија сметка легнале парите. Покрај Ременски, со оваа истрага е опфатена и Јасна Мандиќ заменик претседател на Меѓународниот сојуз, дознава НОВА.

Бојан Јoвановски со потпретседателката на Меѓународен сојуз Јасна Мандиќ

 

Во текот на денот се очекува новите осомничени да дадат исказ пред судија на претходна постапка. Обвинителството бара притвор за едно лице од новоосомничените, а за другите мерки на претпазливост.

Битолскиот бизнисмен Силјан Мицевски и струшкиот Ардијан Амзоски кои уплатиле 719.000 односно 233.000 евра на сметката на Меѓународниот сојуз веќе дадоа исказ кај Русковска.

Лидерот на Ал Каида во индискиот потконтинент, Асим Умар бил убиен во воздушен удар на американските и авганистанските сили на југот на Авганистан кон крајот на септември.

Оваа вест за убиството на еден од лидерите на озлогласената терористичка организација денес ја соопштија од авганистанската разузнавачка служба (НДС).

„НДС може да ја потврди смртта на Асим Умар, лидерот на Ал Каида во индискиот потконтинент. Тој беше убиен во американско-авганистански воздушен напад на талибанска база“, објавија од НДС на социјалната мрежа Твитер.

Авганистанското министерство за одбрана уште на 23-ти септември извести за воздушниот напад на Муса Кали на југот на земјата. Тогаш беше соопштено дека е извршен напад на „засолниште кое го користат Талибанците и странски терористи - припадници на Ал Каида“.

На мета на воздушните напади била „група на странски терористи кои учествувале во подготовките на терористички напади“. Во нападот целосно била разурната базата заедно со сета опрема наменета за нападите.

Како што соопштија од НДС, во воздушниот удар загинал пакистански цивил и шест припадници на терористите, меѓу кои бил и извесен Раихан кој му бил курир на лидерот на Исламската држава, Ајман Ал Завахири.

Речиси 2 милиони луѓе во околу 30 окрузи во Калифорнија би можеле да останат без струја, поради силниот и сув ветер кој се заканува да предизвика пожари.

Компанијата "Pacific gas and electricity" соопштила дека струјата ќе се исклучи од претпазливост во среда и ги повикала жителите и компаниите да се подготват да бидат без струја дури седум дена. 

Струјата ќе биде исклучена и во 67 училишта.

Освен тоа, навеле дека е "можно дека опремата на таа компанија за дистрибуција на електрична енергија предизвикала еден од најсмртоносните пожари во Калифорнија" во 2018-та година, кога далноводите се запалиле околу дрвјата.

Истрагата на калифорниското Одделение за шумарство и заштита од пожари утврдила дека таа компанија е одговорна за пожарот во кој загинале 85 лица.

Метеоролозите најавиле дека во среда ќе почне да дуваат силни ветрови, кои, во комбинација со ниската влажност, би можеле брзо да го рашират пожарот.

 

И кога ќе добиеме впечаток дека ситуацијата конечно се смирува, дека сириските деца ќе можат да растат во мир и дека раселените ќе се вратат во своите домови, пристигнуваат закани за нови инвазии кои како да не им беа доволни на Сиријците веќе 9 години.

Приказната за сојузот на Американците и сириските Курди е приказна за едно големо предавство, но за жал Курдите веќе и се навикнаа на такво нешто, со оглед на тоа што гаранција за нивната безбедност на северозападот на Сирија до неодамна беше Русија, која исто така им го заврти грбот и попушти пред притисоците на Ердоган.

Русите воопшто не се двоумеа, кога дојде време да изберат помеѓу Турција и Курдите, тие веднаш ја избраа Турција, а Американците се двоумат веќе неколку месеци затоа што Турција им е сојузник во НАТО, но курдските "YPG" борци им беа сојузници во борбите против Исламската држава.

Ердоган не ги криеше своите амбиции - да ги протера Курдите од своите домови во една странска земја, а со намера Американците да го одвратат од агресијата, беше постигнат договор за формирање на таканаречени безбедносни зони кои иако се тврди дека се за нешто сосема друго, реалноста е дека имаат за цел да ги протераат курдските борци кои го бранеа населението во регионот од џихадистите на Исламската држава.

 

Ердоган не се откажува

Сепак, Ердоган сега оди чекор подалеку - тврди дека Американците не прават доволно за воспоставувањето на тие безбедносни зони и најавува инвазија источно од Еуфрат. Во меѓувреме, Трамп донесе наредба за повлекување на американската армија од регионот, со што практично им даде одврзани раце на Турците за инвазија на северот на Сирија.

Сега, кога Ердоган најави напад на Курдите, Трамп беше приморан да се огласи на Твитер и да се закани дека доколку Турција „ја премине границата на хуманоста“, тотално ќе ја уништи турската економија.

На Ердоган треба да му се признае дека не се откажува. Кога Сиријците го ослободија Алепо, тој се насочи кон Идлиб и дури успеа таму да ја испрати турската армија која што доби „благослов“ од Русија за да влезе во Сирија - најголемиот руски сојузник во регионот.

 

Тогаш Русите ги затворија очите, а сега иако се заканува, токму истото го прави и Трамп. Со ова Ердоган успеа да балансира помеѓу Вашингтон и Москва, а притоа да одработи за „интересите“ на Турција. Колку ќе биде толериран од САД и Русија, останува да видиме, иако историјата на ривалството помеѓу двете најголеми сили ни кажува дека тешко дека ќе дојде до договор помеѓу Вашингтон и Москва за заедничко спротиставување.

После одлуката на Трамп да ги остави Курдите на цедило, веднаш во САД следуваа жестоки реакции кои доаѓаа од редовите на Демократите, но и од редовите на „неговите“ Републиканци. Хилари Клинтон порача дека Трамп застанал на страната на авторитарните лидери Путин и Ердоган, наместо на страната на курдските лојални сојузници.

Дали е Трамп на страната на „авторитарните лидери“? Сигурно дека не е, туку сака да ги оствари своите предизборни ветувања за повлекување на војниците. Но, тоа дефинитивно значи слабеење на позицијата на САД на Блискиот исток, нешто што американската политичка елита не може да го дозволи.

 

Курдите страдаат најмногу

Алијансата на Курдите и САД може да се каже дека ја одржуваше ситуацијата на северот на Сирија мирна, а распадот на тоа е рецепт за тотален хаос.

Што можат да направат Курдите? Сега им останува само да видат каква ќе биде понудата на властите во Дамаск или да почекаат и да видат дали Ердоган ќе се исплаши од заканата на Трамп и нема да реагира жестоко. Лидерите на курдските борци порачаа дека ќе го бранат регионот, односно своите домови во Сирија по секоја цена, но тешко дека ќе можат да издржат без поддршка на некој влијателен фактор.

Не е тешко да се разбере положбата на Курдите. Нивната положба од стартот на граѓанската војна е крајно лоша, во најмала рака ужасна. Курдското население беше тероризирано од страна на џихадистите на Исламската држава кои правеа разни ѕверства врз цивилното население.

 

Токму поради тоа, Курдите ги формираа своите единици, затоа што практично немаше кој да ги одбрани од џихадистите. Сега, кратко после крахот на Исламската држава, наместо да живеат во мир, пристигнува нова закана - Турција сака да ги протера од нивните домови и за жал нема кој да ги одбрани.

Дали сега Американците ќе им кажат „преселете се малку појужно и оставете го Ердоган кога не можете против него“, останува да почекаме и да видиме. Всушност, тоа сценарио е најверојатно.

Top