Повеќе од 300 лица се убиени во последната деценија во судири на банди поради користење на земјиште и ресурси во Амазонија.

Станува збор за банди кои се поврзани со организации кои што профитираат од огромното илегално сечење на шумите во бразилска Амазонија, објавија од организацијата "Human Rights Watch".

Од целата „војна“ која што се води во Амазонија, само 14 случаи завршиле на суд, објавија од непрофитната организација во нивниот голем извештај кој се темели на 170 интервјуа.

„Тоа навистина покажува колкаво е нивото на неказнување. Истрагата и одговорноста навистина потфрлиле“, изјави Цезар Муњоз од "Human Rights Watch" за британската новинска агенција „Ројтерс“.

 

Околу 60% од амазонската прашума која што се смета за клучна во борбата против климатските промени се наоѓа во Бразил. Оваа година во Бразил порасна уништувањето на прашумата, откако Амазонија беше зафатена од најголемиот број на пожари од 2010-та година.

Од "Human Rights Watch" посетиле неколку бразилски сојузни држави од 2017-та до првата половина на 2019-та година и во објавениот извештај е наведено дека речиси половина од убиствата се поврзани со илегалната сеча на шума во северната сојузна држава Пара.

 

Во градот Ново Прогресо во Пара, тамошните обвинители сметаат дека координирана група на 10-ти август намерно подметнала пожари во прашумата.

Поранешната министерка и претседателска кандидатка Марина Силва изјави дека извештајот е доказ за заостанувањето на Бразил во врска со сочувувањето на околината, додека пак од канцеларијата на бразилскиот претседател Жаир Болсонаро одбија да дадат коментар за извештајот на "Human Rights Watch".

Капитенот Никола Ѓоргиев одигра уште еден брилијантен натпревар и беше вистински лидер во триумфот над Словенија со што се ставивме во позиција да можеме да се пласираме во осминафиналето на Европското првенство.

По дуелот во „Стожице“, Ѓоргиев неколкупати посочи дека срцето му е полно, односно дека сака да заплаче, ама нема солзи од замор. Поради ова популарниот Кинг Нико одлучи да ги искористи социјалните мрежи каде испрати една кратка, ама емотивна порака:

-За мојата земја, за мојот народ, за Македонија. Гази Македонија, -порача капитенот.

Прес-службата на Северната руска флота извести вчера дека е започната инсталацијата на системите за против-воздушна одбрана „С-400“ на рускиот архипелаг на Арктикот - Нова Земја.

Русија во последните години ги интензивираше воените, трговските и истражувачки активности на Арктикот со изградба на транспортни и енергетски постројки, како и развој на Северниот морски пат како дел од североисточниот премин кој ја поврзува Европа со Азија.

„Против-ракетниот полк на Северната флота е поставен на островот Јужни во архипелагот Нова Земја и целосно е опремен со новите системи „С-400“. Новите системи на против-воздушна одбрана ја прошируваат воздушната зона која ја контролира нашата војска“, стои во соопштението на руската армија.

Некои земји, вклучувајќи ги Соединетите Американски Држави ја критикуваат зголемената воена активност на Русија во овој регион. Одговарајќи на критиките, рускиот министер за надворешни работи Сергеј Лавров изјави дека Русија не се заканува на никого, туку тоа е само гаранција за одбраната на земјата.

Во обидот да се избегнат конфликтите на Арктикот, главните сили во регионот - САД, Канада, Данска, Финска, Исланд, Норвешка, Шведска и Русија основаа Арктички совет, форум за меѓувладина соработка на кој на секои шест месеци се состануваат официри, а на секои две години се состануваат и министрите на земјите.

Русија ја зајакна својата моќ во Арктичкиот регион и воспостави контрола над клучните поморски патишта, додека пак Кина исто така вложува напори за влез во регионот, зголемувајќи го своето воено присуство.

Сфаќајќи ја важноста на регионот, американски Пентагон планира да спроведе вежби и да формира експедициски групи на маринци способни да делуваат во арктичко опкружување, како и да го зголеми партнерството со сојузниците во одбрана на важните поморски патишта во регионот.

Од програмата за намалување на аерозагадувањето за 2019 со два милиони евра, нема ништо реализирано, а објавена e само една јавна набавка за која сè уште нема склучен договор, во висина од 439 илјади евра за замена на греење во јавни објекти, велат од О2 Иницијативата.

При тоа, додаваат од таму, пренаменети се средства од оваа програма за гасификација на болницата во Струмица, што требаше да се направи независно.

„Макрадули и самиот потврдува дека има пренамена на средствата, затоа што не направиле веб платформа за следење на имплементација на Планот за чист воздух и не направиле кампања во врска со различните облици на аерозагадување. Она што заборавил да додаде, е дека не е направен ниту план за замена на постоечките нееколошки системи за греење во домаќинства и јавни објекти во најзагадените градови. Планираните средства за изготвување на потребните законски измени и правилници исто така се тргнати“, велат од О2 Иницијативата.

 

Тие истакнуваат дека на прес-конференцијата минатата недела, заменик-министерот за животна средина, Јани Макрадули, објавил дека ќе бидат набавени инвертери, топлински пумпи и сл. за домаќинства и јавни објекти во вредност од 64 милиони денари во сите општини кои се пријавиле, не само во најзагадените, како што стои во Програмата. А во неа, додаваат таму, првично стои дека за таа цел треба да се наменат 69 милиони, за да со изменета пред две недели станат 74.5 милиони.

„Поради пренамената, пак, пред недела дена на 5 милиони за гасификација на струмичката болницата, треба да има 69.5 милиони за таа цел, а не 64. На крај, јавна набавка до денес е објавена само за 26.76 милиони за измена на начинот на греење во јавни објекти, а таму ги нема Битола, Тетово, Куманово, Кичево, Струмица, Велес, Гостивар, Аеродром, Гази Баба, Чаир, Шуто Оризари, Кисела Вода, најзагадените општини. Хаос. Нема никаква дилема и јасно се гледа дека на брзина менувале и одлучувале, без потпирање на вистински анализи и планови. Инаку, во годишниот план на Владата јавните набавки биле планирани да се спроведат во текот на март и април, сега ќе слушавме за нивната реализација“, велат од О2 Инцијативата и истакнуваат дека од програмата за намалување на аерозагадување за оваа година, сè останува на ќе, на прагот од грејната сезона и само три и пол месеци до крајот на 2019.

Покрај долгата низа на ќе активности од Програмата за 2019, додаваат од таму, поразително е што Макрадули изјавува дека ова е прва зима каде што борбата со аерозагадувањето започнала летово. Од таму велат дека борбата против аерозагадувањето требало да започне со првиот ден од формирањето на оваа Влада и да не престане. Ваква изјава, додаваат од О2 Иницијативата, при крај на мандатот, само ја дава вистинската слика за тоа како оваа Влада (не) се справува со аерозагадувањето.

„Важно упорно се лиферува бројката од 20-ина милиони евра кои другите институции ги намениле за намалување на аерозагадувањето, иако таа сума ја наведуваа првично за заштита на животната средина. Кога ќе ги прашаш на што се планирани, потрошени тие 20-ина милиони евра, одговор нема. Ни МЖСПП, ни министерството за финансии, ни Макрадули, ни Заев, никој. Ама важно бројката се врти, кружи. Ефектот од звучноста на бројката во јавност е важен, не вистинската борба против аерозагадувањето и вистинско одвојување на потребните средства таму каде се неопходни. Каква е таа отчетност, транспарентност кон граѓаните? Декларативна само, не суштинска. Зошто суштината е шуплива, не е за јавност“, велат од О2 Иницијативата.

Од таму потсетуваат дека Макрадули во ноември минатата година, кога го презентирал Планот за чист воздух, кажал дека ќе се набават комплетно нови инструменти за сите постоечки 18 мерни станици во 2019 година.

„Еве сме на крај од септември 2019 и нема податоци од 19 инструменти од 13 станици, за поставување на нови и не станува збор. Тој задоволен изјавува дека овој план за 2019 го исполниле. За него исполнување е „ќе“, измените на Програмата за 2019 три месеци пред крај, неисполнетите редица активности од Планот за чист воздух, нереализираните донации од донаторската конференција, немањето забрана за користење на јаглен, немањето закон за индустриски емисии, немањето потребни контроли на загадувачите, неисправните мерни инструменти, немањето јавен превоз кој нема да загадува, дивите населби и горењето кабли секојдневно, палењето отпад насекаде, на ниви, диви и градски депонии, итн. Да беше ова во приватна компанија, наместо државно министерство, до сега многу сликовито ќе му објаснеа дали е ова исполнување на планираното или дебакл од неисполнување“, велат од О2 Иницијативата.

Синоќа во интервју за „ТВ21“, адвокатката на поранешната специјална обвинителка Катица Јанева најави дека денес ќе побара укинување на нејзиниот притвор.

Ирена Фрчкоска меѓу другото откри дека била влошена здравствената состојба на поранешната специјална обвинителка која што се наоѓа во притвор во затворот Идризово.

Меѓу другото, адвокатката Фрчкоска порача дека можно е поднесување на тужба против Советот на јавни обвинители поради разрешувањето на Катица Јанева од СЈО, нагласувајќи дека законот ѝ го дозволува тоа и дека ќе се бара соодветен надомест.

„Законот и дозволува на Јанева да поднесе тужба за разгледување на одлуката за разрешување и да бара соодветен надомест доколку се утврди дека е разрешена на незаконит начин. Но, прво треба да ја примиме одлуката, па ќе видиме како ќе постапиме“, изјави Фрчкоска за „ТВ21“.

 

Адвокатката на поранешната специјална обвинителка која што се наоѓа во Идризово како обвинета за случајот „Рекет“, синоќа порача дека ќе бара укинување на мерката притвор.

„Во фаза сме на подготовка на барањето за укинување на мерката притвор. Ќе бараме да се брани од слобода со депонирање на соодветна гаранција во недвижен имот. Сметаме дека нема основа за притвор, бидејќи таа веќе не е специјален јавен обвинител и не може да ја злоупотрбува својата положба“, изјави Фрчкоска.

Неколку стотици демонстранти протестирале во францускиот град Нант, во период кога ширум Франција повторно заживеаа протестите на „жолтите елеци“, насочени против владата на францускиот претседател Емануел Макрон.

Полицијата употребила солзавец бидејќи некои демонстранти фрлале предмети кон нив.

Портпаролот на локалната префектура изјавил дека 21 лице е уапсено, пренесува агенцијата „Ројтерс“.

 

На снимките од локалните телевизии се прикажани групи демонстранти во црно, кои се обидувале да обијат продавници и да влезат во полициските камиони со водени топови. Демонстрациите на „жолтите елеци“ започнале поради зголемувањето на данокот на горивото, и прераснаа во општ протест против Макрон и владата.

 

Макрон се обидел да ги ублажи тензиите со 17 милијарди евра наменети за мерки како зголемување на минималната плата, укинување на даноци и финансиска помош за сиромашните пензионери, но претседателот се соочува со нова рунда на гнев за реформата на пензискиот систем, која треба да спои 42 различни пензиски фонда во Франција во еден единствен систем.

 

За поефикасна координација на акцијата за уривање на охридските дивоградби денеска се одржа средба на градоначалнкот Константин Георгиески со министерот за внатрешни работи, Оливер Спасовски и министерот без ресор Едмонд Адеми.

На средбата било посочено дека акцентот ќе биде ставен на активните дивоградби и објектите во активната зона на Националниот парк „Галичица“ и крајбрежјето.

Градските власти информираат дека при крај се подготовките за започнување на акцијата за уривање на дивоизградени објекти на подрачјето на Охрид, опфатени во регистарот изготвен според препораките на Комитетот за заштита на светското културно и природно наследство на УНЕСКО.

„Според динамичниот план паралелно ќе се рушат дивоградбите кој што се во тек и оние опфатени со регистарот на дивоизгредени објекти во охридското подрачје. На почетокот, ќе се отстрануваат објекти кај кои не постојат правни пречки“, се наведува во соопштението од општина Охрид.

Активностите на општинските власти во справувањето со нелегално изградените објекти ќе бидат поддржани од надлежните државни институции, а сѐ ќе се одвива со постојана меѓусебна координација.

Американскиот претседател Доналд Трамп потврди дека одобрил користење на американските нафтени резерви после нападите на саудиските нафтени постројки кои го преполовија производството на нафта во таа земја.

„Со оглед на тоа што нападот во Саудиска Арабија би можел да влијае на цената на нафтата, одобрив користење на нафтата од нашите стратешки резерви, во количина која ќе биде одредена и ќе биде доволна за да обезбеди добро снабдување на пазарот“, порача американскиот претседател Доналд Трамп.

„Им порачав на сите надлежни агенции да го забрзаат давањето на дозволи на сите нафтоводи на подрачјето на Тексас и во другите американски сојузни држави“, порача Трамп.

 

Цената на нафтата на светскиот пазар денес скокна за повеќе од 10%, односно забележан е највисок скок во последните 4 месеци, затоа што нападот со дронови на саудиските постројки од страна на Хути бунтовниците од Јемен, го намали производството на нафта во Саудиска Арабија за повеќе од 5 милиони барели дневно, или 5% од вкупното производство во светот.

Нападите со дронови на двете нафтени постројки на саудиската државна нафтена компанија „Арамко“ предизвикаа избувнување на големи пожари и намалување на саудиското производство за 50%.

 

Американците за нападите го обвинија Иран, нешто што официјален Техеран веднаш го отфрли, иако е јасно дека Иранците се големи сојузници на Хути бунтовниците од Јемен кои се одговорни за нападот. Трамп сугерираше дека САД се подготвени и за одмазда на тие напади.

„Саудиските нафтени извори се нападнати. Постојат причини поради кои веруваме дека знаеме кој е виновникот. Спремни сме за реакција во зависност од верификацијата, но чекаме од Саудијците да ни кажат кој го извел нападот и под кои услови ќе продолжиме понатаму“, порача Трамп.

Погрешно би било подемот на политичарите како Доналд Трамп, Борис Џонсон или десничарската Алтернатива за Германија, да го гледаме само како привремено отстапување од политичката норма, вели светски познатиот укажувач, Едвард Сноуден, во интервју за германскиот неделник „Шпигел“.

Човекот кој го обелодени масовниот надзор од страна на американските служби, сега, во изјави за неколку германски весници, предупреди на јакнењето на интернет концерните, велејќи меѓудругото, дека се надева на азил во Германија или Франција.

Поминаа шест години откако Едвард Сноуден (36) откри дека американските и други западни служби во било кој момент може да прислушуваат секого. Денес, Сноуден предупредува дека демократското движење во Хонгконг ќе биде задушено со истите методи – сеопфатен надзор, пренесува „Дојче Веле“.

Поврзана слика

Говорејќи за подемот на Трамп и Џонсон, Сноуден рече дека светските политичари и бизнисмени сфатиле дека можат да ја користат технологијата за да влијаат врз светот на повисоко ниво.

Тој е убеден дека техничкиот развој на интернетот станува опасност за демократијата.

„Во свет под целосен надзор во кој секое кршење на законот ќе се гони без исклучок – сите луѓе би биле криминалци“, вели Сноуден кој бара итно прекинување на масовното собирање на лични податоци.

Ова, забележува тој, не се однесува само на тајните служби, туку и на постапките на големите интернет компамнии како „Фејсбук“ и „Гугл“.

Поранешниот американски разузнавач вели дека првиот чекор е да им се објасни на луѓето колку се всушност следени на секој чекор.

„Доколку никој не развие алтернатива на актуелната состојба, тогаш јас самиот ќе го направам тоа“, изјавил Сноуден за „Шпигел“.

Поради масовна тепачка која ја предизвикале насилници на повик од незадоволен пациент, скопската болница „Св. Наум Охридски“ била затворена до раните утрински часови.

Околу 02:00 часот по полноќ, група на пијани лица ги нападнале болничките служби и полицијата, која била повикани на помош, во поранешна „Градска“ болница. Инцидентот се случил непосредно откако пациентот пристигнал во болницата со расекотина на раката, а потоа групата насилници започнала физичка пресметка со персоналот во болницата, докторката во паника избегала додека медицинската сестра и портирот биле претепани. По интервенцијата на полициската единица „Алфи“ алхохолизираните напаѓачи нападнале и еден полициски службеник дознава Нетпрес од свој извори.

„Имаше голем судир, нападнат е персоналот, обезбедувањето, а потоа беше нападната и полицијата која беше повикана на помош. Тоа беше голема група напаѓачи, немаме точна бројка, пациентот кој ги повика имаше повреда на раката. Настанот се случи околу 2-3 часот. Болницата е затворена за пациенти, за да се избегнат понатамошни инциденти. Кога пристигнав на работа утрово, побарав да се отвори за пациентите да бидат примени во болницата “, рече Иво Спировски, директор на Универзитетската клиника.

Top