Американските експерти соопштиле дека сите шест нуклеарни електрани кои се наоѓаат во регионот каде се очекува да помине и ураганот Флоренс се безбедни, меѓутоа, поединечни експерти не се толку сигурни, предупредувајќи дека поплавите би можеле да ги загрозат нивните системи за заштита.

Шесте нуклеарни електрани во Северна и Јужна Каролина се наоѓаат директно на проектираниот пат на бурата, соопштила Мери Катерин Грин, портпаролка на компанијата во чие сопствеништво се електраните. 

Нуклеарната електрана Брунсвик и електраната Шерон Харис во Северна Каролина се најблиските места каде се предвидува удар од ураганот, додала Грин.

Џеф Бјард, помошник администратор на агенцијата "FEMA" изјави дека агенцијата не е загрижена за електраните кои ќе се најдат на патот на невремето во "овој момент".

"Овие електрани се заштитени, имаат резервни генератори за електрична енергија и брзо можеме да процениме било какво влијание на нуклеарните електрани по невремето", изјавил Бјард.

Меѓутоа, Унијата на загрижени научници, научно ориентирана јавна политичка организација, е загрижена за способноста на електраната Брунсвик да ги издржи силните бури, поради тоа што групата вели дека нема доволно информации за спремноста на фабриката.

Поплавите во нуклеарните електрани станаа загрижувачки бидејќи во 2011 година по земјотресите и последиците од цунамито во Јапонија се предизвика една од најлошите нуклеарни катастрофи кога три нуклеарни реактори се истопиле и ослободиле опасно зрачење во околината. 

Во Европа пристигнува нов пеколен топлотен бран, покажуваат прогнозите кои што ги објави порталот “Severe Weather Europe”.

Температурите кон средината и крајот на овој месец во централна, западна, источна и југоисточна Европа ќе бидат за 8 до 10 степени Целзиусови повисоки од вообичаените температури карактеристични за тој период од годината.

„Таквата аномалија на високи температури значи дека максималните дневни температури би можеле да бидат до 30 степени Целзиусови на далечниот север и на делови од северна Германија и Бенелукс“, стои во текстот.

Ситуацијата според “Severe Weather Europe” нема да биде поразлична ниту во останатите делови од Европа.

„Пониско на југот, во Франција, Италија и Панонската низина, вклучувајќи делови на Унгарија, Хрватска и Србија, температурите би можеле да се искачат и над 30 степени Целзиусови“, се прецизира во текстот.

Според споменатиот портал, врвот на новиот топлотен бран кој ќе го погоди Стариот континент се очекува да биде кон средната на идната седмица.

Граѓанска иницијатива „Го Сакам Водно” реагира на изјавите на скопскиот градоначалник Петре Шилегов, според кој активистите против изградбата на гасовод низ Водно, ги игнорирале фактите и биле каприциозни.

Тие му порачуваат: ,,Каприциозни сме затоа што не дозволуваме да се уништува заштитено подрачје, кога има алтернативи? Каприциозни сме затоа што ја работиме Вашата работа, затоа што со активни членови од важечки закони ве демантираме Вас и заменик министерот за животна средина, Јани Макрадули, кога велите дека Водно не е заштитено и со тоа да си олесните на Вашата совест што ќе дозволите да се уништува парк-шумата Водно и Ви го загрозат градот? Каприциозни затоа што не дозволуваме опасност по жителите во подножјето на Водно од лизгање на земјиштето? Каприциозни зошто редица процедури, закони, конвенции се прекршени во целата постапка на изградба на овој гасовод и тоа Ви го укажуваме?”.

Активистите во обраќањето до Шилегов посочуваат дека во изминативе неколку месеци, на тема гасовод низ Водно, стотици аргументи и факти му биле ставени на располагање и на него и на претставниците на другите инволвирани институции.

,,За да бидеме попрецизни, уште пред неколку месеци, ние како активисти Ви ги дадовме клучните податоци за трасата, нејзината должина и штетата по природата и планината. До тогаш вицепремиерот Анѓушев беше уверен дека се работи за само 600 метри по што се договоривме заедно да се качиме на Водно и го провериме тој податок на лице место. Измената на трасата во потег од 4.3 км се должи токму на тие факти презентирани од наша страна. Факт е дека до ден денешен не е презентирана компаративната анализа врз која се донела одлука трасата да помине низ Водно. Факт е дека договорот за заемот од 90 милиони евра со Дојче и Ерсте банка за изградба и на овој гасовод не е даден на увид. Факт е дека има низа на нерегуларности во целата постапка, дел кои ги наведовме и доставивме и до Вас и до надлежните инспекторати. Факт е дека Вие во декември и март баравте

- преиспитување на трасата на гасоводот,

- изготвување на нова оцена на влијание врз животната средина,

- повторување на постапката за добивање на потребната документација за изградба на предметната делница на гасоводот,

- наведувате дека од 53 документи врз основа на кои е издадено одобрението за градење, нема документ со кој е одобрена градба во заштитено подрачје

- потенцирате дека не било земено предвид дека трасата на гасоводот минува низ заштитениот локалитет парк-шума Водно.

Интересно како тогаш парк-шумата Водно била заштитено подрачје, а сега не е. Или тогаш или сега не ја кажувате вистината. Во кој било случај тоа зборува за Вас и Вашиот интегритет и како фактите се менлива категорија по потреба.

Господине Шилегов, додека Вие нè убедувавте дека ќе ја глумите кокошката која ќе се сопне по сопствено уверување, во најдобриот час, за да не се продаде лесно, не најдовте за потребно да дојдете на терен со нас, да ги видите „фактите“, оставајќи ги претставниците на другите институции со врелиот костен на погрешни информации, да се печат пред новинарите, за цело тоа време, Вие и Вашите советници, на многуте состаноци кои ги имавме минативе месеци ни потврдувавте дека сме 95% во право, за сега во првиот момент кога се најдовте под притисок на политиката, во јавност да не навредувате?

Конечно, велите сме биле малкумина. Побарајте од Вашите многубројни нови и стари советници во градот, да ви направат реална проценка на жителите на Скопје кои се против изградбата на гасовод низ Водно. Побарајте ако можат да Ви направат анализа за граѓанското незадоволство од уште еден обид да се уништи парк-шумата. Нека Ви ги кажат реакциите на граѓаните на социјалните мрежи, ама нека ги исчистат Вашите партиски ангажирани коментирачи, за да можете конечно да добиете чувство за јавноста. Ако ништо друго, нека Ви ги прочитаат здруженијата и иницијативите кои стојат зад потписот на Го Сакам Водно, комплетно обединети зад овој став.

Да, знаеме, дека ќе најдете контрапротестанти, неколку пати ни беше дадено на знаење, да не кажеме закането со нивно активирање, а еве на последната дебата кај што бевте домаќин, некои од нив беа донесени, веројатно убедени дека играњето на националистичката карта ќе не поколеба и исплаши.

Градоначалниче Шилегов, навредите кон граѓанските активисти, никогаш не се добра стратегија за ПР. Во политички контекст многу брзо ќе сфатите дека претворајќи ги граѓаните кои волонтерски работат за општествен бенефит, при тоа во добар дел работејќи ја и Вашата работа (грижа за загадувањето, за животната средина, за чистотата, за животните…) во непријатели, најочигледно ќе се рефлектира врз Вашиот углед. Притоа, ниту првата година од вашиот четиригодишен мандат не е измината. Што Ве чека допрва ако сега сме каприциозни и малкумина?”, се вели во пораката на Граѓанска иницијатива ,,Го Сакам Водно” до скопскиот градоначалник.

Најголемите воени вежби во современата историја на Русија, „Исток 2018“, почнаа на Далечниот исток, соопшти Одделението за информации и масовни комуникации на Министерството за одбрана на Русија. Претседателот Владимир Путин ќе се состане по воените вежби со кинескиот колега Си Џипинг во Владивосток, во текот на кој ќе потпишат неколку договори.

„Исток 2018“ ќе се одржат од 11. до 17. септември под раководството на рускиот министер за одбрана на Русија, Сергеј Шојгу на Далечниот исток и во руските води од Тихиот Океан. Маневрите ќе бидат најголеми во последните 37 години и во нив ќе учестуваат речиси 300.000 војници, над илјада авиони, хеликоптери и беспилотни летала, до 36.000 оклопни возила, до 80 бродови и бродови за поддршка. Во една фаза ќе учествуваат и единиците од Кина и Монголија.

Во текот на воените вежби ќе биде одработена примена на воените групи во интерес на осигурувањето на безбедноста на Русија. Главна цел на маневрите е проверка на подготвеноста на органите на воената управа во планирањето и  спроведувањето на прегрупирањето на трупите на оддалечени локации, организирање на соработката меѓу копнените групи и поморските сили, а командантите и штабовите ќе добијат пракса и ќе ги усовршат своите вештини во водењето на трупите.

Воените вежби ќе се одвиваат во две фази: во првата на Далечниот исток ќе бидат распоредени трупи, а морнаричката група ќе се зголеми во северната и далекуисточната морска зона. Во втората фаза командантите и штабовите ќе одработат управување со комбинирани групи војска со практична примена на одбрамбените и офанзивните дејства.

Основните воени маневри ќе се одржат на полигоните на Источниот воен округ „Цугол“, „Бабмурово“, „Радигино“, „Успеновски“ и „Бикински“, како и на полигоните на авијацијата и ПВО „Литовко“, „Новоселско“, „Телембра“ и „Бухта Ана“, во водите на Беринговото и Охотското море, Авачинскиот и Кроноцкиот залив. На полигонот „Цугол“ во заедничките практични дејства ќе учествуваат и кинески војници.

Во маневрите ќе учестуваат и органи на воената управа, единиците на Источниот и Централниот воен округ, силите на Северната флота, единиците на воздушно - десантните сили и воено - транспортната авијација на воздушно - вселенските сили на Русија.

Рускиот претседател Владимир Путин го водел кинескиот колега Кси Џинпинг на палачинки, што е доказ за добрите лични односи на двајцата лидери.

Путин и Кси јаделе палачинки со кавијар и вотка на изложбата на маргините на економскиот форум во Владивосток. 

Москва и Пекинг развиле "стратешко партнерство" кое го одржува нивното заедничко противење на "униполарниот свет", што е термин со кој се означува глобалната доминација на САД.

 

Приближувањето е олеснето со добрите лични односи на Путин и Кси, кој се смета за најмоќен кинески лидер од времето на Мао Це Тунг.

Двајцата се сретнале речиси 30 пати, а Путин во една прилика рекол дека кинескиот претседател е единствениот светски лидер кој го поканил на роденден.

 
 
 
 
 

 

Претседателот на најголемата опозициска партија во Македонија, Христијан Мицкоски ги повика граѓаните да гласаат по сопствено убедување на референдумот на 30-ти септември.

После состаноците во партијата, опозициската ВМРО-ДПМНЕ им порача на своите гласачи, како и на сите граѓани на Македонија, да одлучат по сопствено убедување како да постапат на предстојниот референдум.

Мицкоски на прес-конференцијата која што заврши предмалку, на граѓаните им порача дека сите знаат за што тој зборува, дека граѓаните знаат што треба да направат. Тој порача дека граѓаните треба да го следат срцето и дека ќе се поклони на конечната одлука која што ќе ја донесе народот.

„ВМРО-ДПМНЕ останува на ставот дека е против овој Договор, затоа што се менува Уставот на државата. Ние сме за членство во НАТО и Европската унија, затоа што тоа се наши пријатели. Но, ние сме на страната на сите кои што се против овој Договор, на било кој начин“, изјави Мицкоски и додаде:

„Прашањето за името е едно од најважните за нашата држава, историско прашање кое што се однесува на иднината и на младите. Ова не е прашање за Мицкоски или Заев, туку за Македонија. После консултациите со граѓаните и одржаните состаноци, донесовме одлука дека секој граѓанин треба да постапи по сопствено убедување на референдумот“.

„Имате се пред вас и вие знаете што треба да направите. Треба само да го слушате вашето срце и вашиот разум. Македонија ќе победи“, порача лидерот на ВМРО-ДПМНЕ.

Левица ги повика граѓаните на бојкот на референдумот, односно да не излегуваат на гласање. Од политичката партија велат дека граѓаните треба да ја спречат власта да владее понатаму, бидејќи како што велат, истата не е легитимна. Левица, исто така, упати апел за донации за финансирање на кампањата против референдумот за да информира и да повикува на бојкот преку јавните сервиси.

Хактан Реџеп Исмаил од партијата вели дека Левица иницира граѓаните да излезат на протести во сите градови, да ги блокираат улиците и да го кренат гласот против договорот со Грција и рече дека тие ќе им се придружат.

„Со самото тоа што референдумот е консултативен, власта се плаши да понесе политичка одговорност. Организирањето на референдумот не е добар, а граѓаните немаат доверба во резултатите. Една од најголемите причини за бојкот е бидејќи договорот меѓу Заев и Ципрас не ги решава проблемите и прави поделби меѓу народите во Македонија”, рече Исмаил.

Според Алек Атевиќ без разлика дали ќе има позитивен или негативен исход на референдумот, договорот со Грција ќе стапи во сила.

„Ги повикуваме граѓаните да се вклучат во организациите кои се борат за човекови права и да го контролираат референдумот. Албаниците се користат како плашило во Македонија. Албанците мора да го одбранат своето достоинство. Тие не се непријател, овде има само еден непријател, а тоа е класниот. Овој референдум е за северна, не за европска Македонија“, вели Атевиќ.

Според Левица, македонските војници кои ќе ги зема НАТО, ќе бидат враќани во лимени сандаци и пластични ќеси разнесени на парчиња. Членовите на партијата велат дека мора да се бојкотира престојниот референдум.

Припадник на „ОМОН“, полициска единица – елитна руска Национална гарда, обвинет е дека во напад на љубомора, брутално ја претепал својата девојка до смрт, а потоа ја фрлил од балкон од 6-ти кат.

28-годишниот Марат Сахапов од Казан, бил во алкохолизирана состојба кога брутално ја претепал 21-годишната Елњара Караханова, а потоа ја фрлил од околу 20 метри висина. Несреќната девојка чие што лице било толку унакажано што никој не можел да ја препознае, паднала на покривот од влезот во зградата каде што се случило злосторството.

Марат толку брутално ја претепал Елњара, така што на нејзините родители не им било дозволено да ја видат својата ќерка, пренесуваат руските медиуми.

Според извештајот на обвинителот кој што го објавија руските медиуми, Марат се сомневал дека Елњара го изневерува, а додека ѕверски ја тепал ѝ се заканувал дека ќе ја силува нејзината мајка и ќе го убие нејзиниот татко.

Убиецот Сахапов тоа го негирал, а во судницата дошол со маска на лицето, нешто што посебно ги изреволтирало родителите на убиената.

„Не се обидов да побегнам, истрчав веднаш долу по неа. Дојдов до неа, ја допирав, но не се сеќавам дали ја свртев. Знам дека моите зборови не им значат ништо на нејзините родители, но искрено барам од нив да ми простат. Знам дека нема да ми простат, апсолутно сум сигурен во тоа, но сакам да кажам пред сите дека јас не ја убив. Не размислував за тоа“, изјави Сахапов, додавајќи дека на неговата девојка ѝ биле украдени парите.

 

Само две пратенички досега побарале да им бидат исплатени парични средства за кирија во Скопје, додека останатите пратеници бараат дневници за да патуваат до главниот град.

Пратеничката од Прилеп од редовите на ВМРО-ДПМНЕ, Ане Лашкоска и пратеничката од Штип, од истата партија, Благица Ласовска, побарале да им биде исплатен надоместок од Собранието во висина од 400 евра за да изнајмат стан во Скопје.

Наемнината на стан е ново право што ќе можат да го користат пратениците, предвидено со измените на законот. Надоместок за закупнина на стан се предвидува за оние пратеници чие место на живеење е надвор од територијата на Град Скопје и доколку не користат надоместок за користење автомобил во лична сопственост за службени цели или надоместок за одвоен живот со семејството.

Ваквата можност се отвори пред две недели откако Комисијата за избори и именувања ги усвои одлуките за доделување паричен надомест од 400 евра за пратениците кои ќе одлучат да изнајмат стан во Скопје. Пратениците имаат избор или да изнајмат стан или, пак, да патуваат со намалените парични средства како надомест за патните трошоци. На оние пратеници кои ќе одлучат да изнајмат стан, ќе им бидат дозволени парични средства од буџетот на Собранието за патни трошоци само за викенди и празници.

На оние пратеници, пак, кои ќе одлучат да патуваат со свој автомобил, паричните средства за патни трошоци ќе им бидат намалени од 30 на 20 отсто, а патарините мора да ги плаќаат електронски, односно со новите картички што ги издава „Македонија пат“, или, пак, со сопствени картички за кои подоцна покрај фискалната сметка ќе мора до Собранието да поднесат и печатена потврда со потпис како доказ за платена патарина.

Од 1 септември пратениците од внатрешноста на државата, кои не поседуваат стан или куќа во Скопје, треба да одберат дали ќе патуваат секој ден до работа со свој автомобил, за што ќе добиваат надомест за гориво во висина од 20 отсто и за патарина, или ќе закупат стан за што Собранието ќе издвои средства најмногу до 400 евра, а трошоците за гориво и патарина ќе им бидат покриени само за викенд и за празници.

Според пресметките на Собранието и тврдењата на пратениците, со ова драстично ќе се намалат средствата за патни трошоци за пратениците. Собранието пристапи кон менување и намалување на начинот за надоместување патни трошоци на пратениците, по повеќе написи и реакции на социјалните мрежи и изнесени суми кои ги зеле пратеници како од претходните собраниски состав, така и од актуелниот.

Промената на начинот на надоместување на патните трошоци во јавноста беше иницирано од СДСМ и владејачкото мнозинство, а поддржано од опозицијата откако во јавноста беа изнесени информации за енормно трошење средства од буџетот за патни трошоци. Некои пратеници по тој основ од Собранието земаа и над 10 000 евра за само неколку месеци. На одлуките им претходеше усвојување од страна на Собранието на измени на законите за пратеници и за плата и за други надоместоци на избрани именувани функционери.

„Макфакс“ годинава објави повеќе истражувачки стории со кои детално го истражува и анализира проблемот со патните трошоци на пратениците. Во првата сторија објавивме дека пратениците и од новиот состав земаат по најмалку 10-12 илјади евра за патување до своето работно место, а потоа го анализиравме и системот според кој Собранието ги прави пресметките за патни трошоци. Пред неколку месеци објавивме нови податоци според кои за само шест месеци одредени пратеници повторно направиле патни трошоци од над 10 илјади евра, и тоа за првите пет месеци од годинава, како и последниот месец од 2017 година.

Новата книга на Боб Вудворд, прославениот новинар на "Washington Post" кој учествувал во разоткривањето на аферата "Watergate", открива уште еден многу интересен детаљ од бурното владеење на Доналд Трамп во Белата куќа.

Трамп во еден момент ја довел Белата куќа на врв на хистерија, бидејќи за малку ќе прател твит кој во Северна Кореја ќе го прочитале како јасна најава за американски напад, открил Вудворд во интервју за "CBS". 

Овие денови во продажба треба да се појави новата книга на Вудворд - "Страв: Трамп во Белата куќа". Авторот вели дека е заснована на бројни разговори со инсајдери од Белата куќа и други службеници кои зборувале под услов на анонимност. Тие тврдат дека Трамп со своето неразбирање на светската политика прави хаос и дека би направил непоправливи штети ако не го спречуваат да ги спроведува своите одлуки - меѓу другото, наводно му крадат документи од работната маса за да не може да ги потпише.

Во едно поглавје Вудворд опишал инцидент кој можел да предизвика нуклеарна војна.

"Во неговите драфтови стоеше: "Ќе ги повлечеме нашите луѓе од Јужна Кореја, членови на семејства на 28.000 Американци"", рекол Вудворд и додал дека станувало збор за семејствата на американските војници стационирани на Корејскиот полуостров.

Тој твит, за среќа, никогаш не бил пратен поради повратните пораки добиени од тајни канали од Северна Кореја, дека таму оваа порака би се сфатила како јасен и гласен знак дека САД се подготвува за напад.

"Во тој момент водството на Пентагон се вкочанило од ужас: "Боже мој, имаме доверлива информација дека Севернокорејците овој потег би го сфатиле како нападот да е неминовен"".

Вудворд тврди дека на Трамп многу му пречи тоа што САД издвојуваат 3,5 милијарди долари годишно за американските трупи стационирани во Јужна Кореја.

"Не знам зошто мора да бидат таму, сакам да ги повлечам", рекол наводно тој на еден состанок, на што министерот за одбрана Џејмс Матис кратко му објаснил дека мора да бидат таму за да спречат Трета светска војна.

Тензиите меѓу САД и Северна Кореја значително се намалиле по самитот Трамп-Ким на 12. јуни во Сингапур, но до пред половина година тензиите меѓу двете држави можеле да се сечат со нож. Еден од најтензичните моменти била заканата на Трамп од 19. септември 2017. година, дека целосно ќе ја уништи Северна Кореја.