(0 гласови)

Речи си две третини од граѓани сметаат дека Македонија нема соодветен пристап во справувањето со загадувањето на воздухот, покажува последното истражување на јавното мислење кое за Детектор го спроведе Институтот за политички истражувања Скопје.

Според него, 62,6% од граѓаните се на став дека земјава нема соодветен пристап во борбата со загадувањето, додека 18,1% се со спротивно мислење.

Споредбата со истражувањето кое ИПИС за Детектор го спроведе во јануари минатата година, покажува дека перцепцијата на граѓаните се влошила. Ако лани во истиот период 26,7% сметале дека земјава има соодветен пристап во справувањето со загадувањето, сега тој процент на граѓани паднал на 18,1%. За сметка на тоа, се зголемил бројот на граѓани кои сметаат дека Македонија несоодветно се справува со загадувањето. Од 58,7% во јануари минатата година, бројот на граѓани кои сметаат дека Македонија нема соодветен пристап за справување со загадениот воздух се зголемил на 62,6%.

Во Скопје, еден од најзагадените градови во Македонија уште поголем процент на граѓани се убедени дека државата не знае да се справи со загадувањето. Анкетата покажува дека 78% од граѓаните од Скопје сметаат дека државата нема соодветен пристап во борбата со загадувањето, додека 11,4% имаат спротивен став.

(0 гласови)

Министерката за финансии Нина Ангеловска денеска порача дека Буџетот е во добра кондиција и оти финансиите се стабилни. Апелираше до политичките субјекти да се однесуваат одговорно и интересите на граѓаните да бидат пред политичкото поентирање и медиумското внимание.

На прес-конференцијата во Владата, Ангеловска рече дека реализацијата на вкупни приходи изнесува 97 проценти и оти се очекува и годинава да има одлична реализација на приходната страна, а редовно се сервисира и расходната страна.

Таа посочи дека ќе продолжи редовната исплата на пензиите кои ќе бидат и зголемени, а ќе бидат исплатени и повисоки плати во образованието и здравството. Старите долгови редовно ќе се исплаќаат, а аукциите на државните хартии од вредност се одвиваат согласно однапред утврдениот календар. Јавниот долг е стабилен и изнесува 47, 7 проценти.

До крајот на месецот, како што најави Ангеловска, треба да биде готова и платформата за јавен долг која ќе овомозжи јасен преглед на целокупниот долг.

Според Ангеловска, со добра динамика се одвива и проектот за субвенционирање на платите, како и повратот на ДДВ кон фирмите. Само во првите 16 дена од месецов исплатени се 926 милиони денари поврат на ДДВ кон фирмите. Одлични резултати, како што рече Ангеловска, дава и мерката за поврат на ДДВ кон граѓаните. Нова исплата се очекува веќе следниот месец, а преку наградната игра која е надполнување на мерката, досега се доделени награди во вредност од 1,8 милини денари.

Соработката со заменичката министерка за финансии во техничката влада, Ангеловска ја оцени како професионална, коректна и на солидно ниво.

Заменик-министерка за финансии од редовите на опозицијата Гордана Димитриеска Кочоска денеска во контрареакција на прес-конференцијата на министерката Нина Ангелосвка праша зошто се оди кон задолжувања, ако Буџетот е во добра кондиција.

На прес-конференција одржана по онаа на министерката за финансии, Димитриеска Кочоска рече дека не се земаат кредити ако има ликвидност на Буџетот.

- Дали таа зема кредити за да има одредена комоција, а после тоа чека да дојде денот да врати друг кредит и при тоа плаќа и камата на кредитот кој што го земала, а ја плаќа каматата и на кредитот којшто ќе го раздолжи во некој иден период – запраша заменик-министерка за финансии.

Таа ја праша министерката за финансии зошто повратот на ДДВ од 15 милиони евра го извршиле во јануари, наместо во декември.

- Дали на овој начин ја изманипулира јавноста со процентот на наплата на данокот на додадена вредност? Воедно ја прашувам зошто фирмите мораше да чекаат подолго време да си го добијат својот поврат на ДДВ, иако знаеме дека сите тие се борат со проблемот со ликвидност – рече Димитриеска Кочоска.

Во однос на изјавата на Ангелова, дека каматните стапки се ниски, а во минатото биле високи, дополнителната заменик министерка потсети дека каматните стапки се формираат на меѓубанкарскиот пазар на пари каде што еуриборот е основата на која што се додава одреден процент на ризик и на основ на тоа се формираат каматните стапки. Во моментот еуриборот е во минус, а, како што нагласи Димитриеска Кочоска, ние повторно плаќаме позитивни камантни стапки.

- За она што го кажа Ангелова, дека побарувачката за државните записи на 14 јануари била многу поголема отколку понудата, ќе посочам дека ова е жално да го каже министер за финансии од причина што кога банките имаат вишок на ликвидност – да, тие даваат поголема побарувачка, бидејќи немаат каде да ги пласираат парите, а зошто немаат каде да ги пласираат парите заради тоа што фирмите тонат. Да ги погледнеме податоците од Народна банка и да видиме какви реструктуирања прават во кредитите, тонат во проблеми со ликвидност, немаат никаков интерес за инвестирање од оваа хаотична бизнис-клима и токму заради тоа побарувачката на 14 јануари беше толку повисока во однос на понудата – констатираше заменик-министерка за финансии.

Во врска изјавата на Ангелова, дека имаат професионална и коректна соработка со дополнителната заменик-министерка, Димитриеска Кочоска рече дека сите барања кои ги има упатено до министерката не се одговорени.

(0 гласови)

Седумдесет и пет затвореници избегале од затвор во источен Парагвај, во непосредна близина на границата со Бразил, соопштија локалните власти, цитирани од Би-Би-Си.

Има сомнежи дека многу од затворениците биле пуштени од чуварите слободно да минат преку централниот влез на затворот.

Откриен бил и тунел, но властите сметаат дека тој може да им послужил само како покритие за бегството.

Десетици од избеганите затвореници му припаѓале на најголемиот криминален синдикат во Бразил. Овој синдикат од Сао Паоло, што брои приближно 30.000 членови, се занимава со шверц на наркотици и оружје во Бразил, како и во Парагвај, Боливија и Колумбија.

По проверка на целиот затворски комплекс, лоциран во источниот град Педро Хуан Кабалеро, во неделата, полицијата открила дека цело едно крило со членови на бразилската банда е испразнето. Во една од ќелиите се најдени околу 200 вреќи со песок.

Парагвајскиот министер за внатрешни работи Евклид Асеведо изјави дека е јасно дека затворските чувари се замешани во бегството.

- Откривме тунел и сметаме дека бил покритие за ослободувањето на затворениците. Имало соучесници кои работат во затворот, рече Асеведо.

Според него, има информации дека затворениците биле пуштани надвор во помали групи во текот на последните неколку дена и тоа се случувало додека директорот бил на годишен одмор.

(0 гласови)

Откако имаше инцидент по скокањето на крстот во Штип, каде врниците кои скокаа се “тепаа“ за него па попот реши да го остави во црквата следеше скандал и во Валандово. Попот во Валандово 3 пати го фрлаше крстот. По два неуспешни обида, бидејќи скокнале непријавени учесници, тој им се обрати со погрдни зборови на присутните и по третпат го фрли крстот. „Багра народ сте, срам да ви е“-рече попот.

 

(0 гласови)

Албанија, Црна Гора, Србија и Македонија имаат рекорден број на затвореници во регионот. Ова го покажуваат податоците на Евростат, според кои во регионов Албанија е земја со најголем број осудени лица за кривични дела во Западен Балкан,во однос на бројот на популацијата.

Според Евростат, во Албанија има 197 затвореници на секои 100 000 жители, рангирајќи се на четвртото место во Европа, по Литванија, Чешка и Естонија. По Албанија е Црна Гора со 179 затвореници. Во Србија, бројот на затвореници на 100 000 жители е 153, а потоа следува Северна Македонија со 146 затвореници, додека Косово со 90 затвореници на 100000 жители.

 

Просечниот број на затвореници на 100.000 жители е 116, што според Евростат, е најниска стапка од 2000 година.

Меѓу земјите-членки на ЕУ , највисока стапка е забележана во Литванија (232 затвореници на 100 000), а потоа следат Чешка (209), Естонија (207), Полска (196) и Латвија (193), а најниска во Данска (59) , Шведска (57) и Финска (56). Во просек во ЕУ, 5% од затворениците биле жени. 

 

Во Франција, Австрија и Германија, бројот на затвореници е помал од просекот на ЕУ – 103, 100 и 79 затвореници на 100.000 жители. Во Италија и Грција, бројот на затвореници на 100.000 жители е 97 односно 93. 

 

Меѓу државите членки, најмал број затвореници е забележан во Исланд, каде според Евростат бројот на затвореници е само 38 на секои 100.000 жители. Потоа се рангираат државите од Северна Европа, при што Финска има само 56 затвореници, Шведска 57 и Данска 59 на 100.000 жители.

 

(0 гласови)

Поранешниот руски премиер Дмитриј Медведев изјави дека поднел оставка поради потребата од спроведување на политички реформи во земјата и поради временскиот фактор.

Тој за руската државна телевизија изјави дека првата и најважна работа што му ја кажал на претседателот Владимир Путин на состанокот на 15 јануари е дека пораката на Путин за промена на Уставот опфаќа многу амбициозни задачи за политичкиот систем, кои до одреден степен ја менуваат рамнотежата на моќта во земјата.

Втората причина, според него, било времето, бидејќи тој бил премиер речиси осум години.

„Ова, на крајот на краиштата, беше многу долга и комплицирана работа поврзана со донесување одлуки за многу комплицирани прашања. Тоа, исто така, треба да се земе предвид“, рече Медведев.

Тој во иднина ќе биде заменик-шеф на Рускиот совет за безбедност, со кој претседава Путин.

Државната Дума на Русија ја потврди кандидатурата на поранешниот началник на Федералната даночна служба Михаил Мишустин за нов премиер на Русија.

(0 гласови)

Законодавниот дом ги изгласа најновите измени и дополнувања на Законот за извршување кои ги подготви Министерството за правда. Ова е втора измена на законот, а од Министерството нагласуваат дека двете измени се во насока на градење на концепт на правично извршување и заштита на достоинството на граѓаните.

Со измените целосно се изземаат од присилното извршување примањата на граѓаните кои се корисници на гарантирана минимална помош, примањата на децата согласно Законот за заштита на децата, како и примањата за социјална сигурност на старите лица, согласно прописите за социјална сигурност на старите лица.

„Измената на Законот за извршување е одраз на реалната потреба за помош и поддршка на загрозените категории на граѓани кои се соочуваат со егзистенцијални проблеми. Социјално ранливите групи на лица, не по своја вина, не се во можност да ги намират своите долгови без да им се загрози егзистенцијата – не само личната – туку и на нивните семејства“, велат од Министерството.

Дополнително, со измените се намалува износот на максималната вредност која може да биде задржана, односно се менуваат ограничувањата на извршувањето и тоа од 1/3 на 1/5 од плата и пензијата за лицата приматели на просечна плата и пензија, надомест на трошоци за сместување на лице и надоместок за згрижување на згрижувачко семејство, како и за децата корисници на семејна пензија.

Примената на законските одредби ќе се однесува и за веќе започнатите извршувања бидејќи станува збор за поповолен закон за граѓаните.

(0 гласови)

Американскиот претседател Доналд Трамп и кинескиот вицепремиер Лиу Хе ја потпишаа првата фаза од трговскиот договор што треба да го зголеми извозот на американски земјоделски и други производи, да ги заштити трговските тајни на САД и да ги намали тензиите во долгогодишниот спор меѓу двете најголеми економии во светот.

Трамп за време на церемонијата на потпишување во Белата куќа истакна дека договорот ги коригира грешките во минатото. Кинескиот претседател Кси Џинпинг во писмото испратено до Трамп, а прочитано од кинескиот вицепремиер, истакнал дека првата фаза од договорот е добра за Кина, САД и целиот свет.

Шји во писмото истакнал дека договорот покажува како двете држави можат да ги решат разликите и да најдат решенија засновани врз дијалог, пренесе агенцијата „Ројтерс“.

Лиу рече дека Кина ќе се придржува кон заложбите од првата фаза на договорот и дека тоа е добро за двете земји и за целиот свет.

Според „Гласот на Америка“, трговскиот договор предвидува Кина да купи повеќе американски производи, но и да престане со практиката да ги притиска странските компании да ја споделат својата технологија и да престане да манипулира со валутите за да го направи својот извоз поевтин.

САД веќе престанаа да ја означуваат Кина како манипулатор со валути, а исто така се откажуваат од воведувањето нови царини на кинеските производи во вредност од милијарди долари. Исто така преполовени се царините на кинескиот увоз од 110 милијарди долари.

Сепак, царините за увоз во вредност од околу 360 милијарди американски долари ќе останат на сила.

(0 гласови)

Граѓаните во земјава не веруваат дека може да добијат правично и фер судење (66%) бидејќи сметаат дека законите не важат еднакво за сите (70,9%), покажува истражувањето на јавно мислење на тема „Правосудни реформи“, спроведено за емисијата „Детектор“ на ТВ Сител, во која гостуваа Бојан Маричиќ – главен технички преговарач со Европската Унија, Лазар Нанев – судија и професор, и Никола Јовановски – Центар за правни истражувања и анализи.

Мнозинството граѓани (64,7%) се изјаснуваат дека во Македонија нема ефикасна судска власт, перцепција која ја потврдуваат и овонеделните гости во „Детектор“ според кои добро познатите проблеми независноста и непристрасноста, квалитетот на судската правда, транспарентноста и отчетноста, ја создаваат таа слика или како што посочува судијата Лазар Нанев „секој случај што трае неколку години, нормално е да води до една перцепција за неефикасност меѓутоа и за селективна правда. Токму одлолговлекувањето на постапките, нивното траење подолг временски период ја создава таа слика за судскиот систем“ – потврдува тој.

Бојан Маричиќ, главниот технички преговарач со Европската Унија свесен за искушенијата кои се „бетонирани“ во извештаите на Прибе и Европската комисија, ги потврдува заложбите за промени и создавање можности за независна судска власт. „Има нова стратегија за судство, има нов сет закони поврзани со обезбедување на понезависен судски совет, позајакната контрола на стручноста при изборот на судиите, но не е сè во законите туку е и во имплементацијата“, вели тој, истакнувајќи дека целта е „законот да важи за сите и да не постојат недопирливи“.

Испитаниците сметаат дека правосудниот систем генерално е подложен на надворешни влијанија (59,7%) и тоа на влијанија од: политиката, (15,2%), власта (13,9%) и странците (9,5%).

„И самите судии признаваат и укажуваат дека има внатрешни и надворешни влијанија, било да се партиски или институционални, со што се укажува на тоа дека треба да ги започнеме долго разговараните реформи и да се упатиме кон реформите и судството на ЕУ“, вели Никола Јовановски од Центарот за правни истражувања и анализи, кој истакнува дека „изминатите 10 години во Македонија се разрешени 84 судии, споредбено со Холандија каде се разрешени само двајца судии“.

Недовербата на граѓаните не е само кон судството (62,0%), истражувањето покажува дека тие не му веруваат ниту на обвинителството (60,1%), ниту на Специјалното јавно обвинителство (55,6%), а омбудсманот е во малку подобра позиција (49,7%).

Токму Специјалното јавно обвинителство по одлуката на Врховниот суд, „во моментов ја чека политичката одлука дали ќе постои или не“, како што вели Јовановски, и ја истакнува пресудната улога на ова обвинителство за случаите на висока корупција. И за преставникот на власта, Маричиќ постоењето на СЈО е мошне значајно „За Владата е неприфатливо СЈО да престане да постои, битно е структурата на СЈО да продолжи да функционира во рамките на редовното јавно обвинителство како посебно обвинителство кое ќе биде вклопено во тој систем и ќе се занимава со висока корупција.“

Генерално граѓаните сметаат дека работењето на правосудниот систем останува исто споредбено со лани, и во судството (36,0%), и во јавното обвинителство (37,9%) и со СЈО (34,3%).

„Единствен начин да му се даде шанса на СЈО е да докаже дека има можност да ги гони потенцијалните случаи на актуелната власт и да му се продолжи мандатот, да му се дадат надлежности со кои тоа ќе му се дозволи. Сè додека е обвинителство само за прислушуваните разговори, ќе може да се занимава со тие случаи“ – вели Маричиќ.

Мнозинството граѓани (63,5%) сметаат дека Македонија не ги исполнува стандардите и препораките на ЕУ во однос на работата на правосудството, а доколку станеме членка на унијата повеќето (53,2%) очекуваат дека полесно ќе го надминеме овој предизвик.

На патот кон ЕУ правосудството е постојана тема бидејќи „поглавјата 23 и 24, правосудство и темелни права, се отвораат први, а се затвораат последни. И ќе бидеме под постојан притисок и од државите членки на ЕУ, и од Европската комисија и од нашата јавност. Тоа ќе нè турка во ситуација во која се помало ќе биде влијанието на политиката, а судството ќе има поголеми капацитети, надлежности и одговорност да биде независно и да биде еднакво со сите други гранки на власта“ – истакнува Маричиќ.

Учесниците во емисијата не ја кријат вербата за кадровски промени, пред сè во судскиот совет, како што истакнува судијата Нанев „интегритетот е клучот на враќање на довербата, непристрасноста и независноста на судскиот совет“, а и во делот на транспарентноста, отчетноста и квалитетот на судската правда која треба да е независна, непристрасна, ефикасна и ефективна.

Истражувањето на тема „Правосудни реформи“ беше спроведено од Институтот за политички истражувања од Скопје (ИПИС) во период од 28 февруари до 5 март, на 1.125 полнолетни испитаници на ниво на целата земја, со користење на случаен примерок, стратификуван за да се запази репрезентативноста на населението.

 

 

 
(0 гласови)

Дојранско Езеро е подрачје што изобилува со разновиден жив свет и токму затоа е прогласено за клучно подрачје за биолошката разновидност во медитеранската “жешка точка”. Поради присуството на значајни видови птици и растенија, тоа е и глобално значајно подрачје за птици и значајно растително подрачје. Веројатно најинтересните видови птици за набљудување што се среќаваат во Дојран се кадроглавите пеликани, кои се загрозен вид.

Според официјалната, но се уште непотполно утврдена статистика, повеќе од стотина пеликани (Pelecanus Crispus), во периодот од ноември до март престојуваат на езерото поради топлата вода и изобилството на храна.

Ги има и на Преспанското езеро. Интересни се затоа што се единствени во својот вид и едни од најголемите.

Должина на телото: околу 180 cm (од 160 до 183 cm);Распон на крилја: околу 3 m (од 290 до 351 cm);Должина на крилјата на мажјакот: 72-80 cm, на женката: 69-72,5 cm;Должина на клунот на мажјакот: 42,0-51,0 cm, на женката: 38,0-42,3 cm;Тежина на птиците: од 9,0 до 13,0 кг;Опашот е краток и прав, од 22 меки опашни пердуви. Должина на опашот кај мажјаците: 23-25 cm, кај женките: 23 cm; Челото е со перја.

Она што восхитува е нивниот таканаречен танц. Поради распонот на крилјата создаваат неповторлива фантастична слика која плени со раскош.

Пеликаните од Дојран или од Преспа после месец март си заминуваат, за повторно да не израдуваат на есен.

Извор ekobalans.mk

Top