Првите 10 европски земји по бројот на странски директни инвестиции се Велика Британија, Франција, Германија, Шпанија, Белгија, Полска, Турција, Холандија, Русија и Ирска, покажува студијата на компанијата Ernst & Young која е објавена во средата.

Оваа компанија спровела анкета за атрактивноста на Европа во која учествувале повеќе од 500 меѓународни компании, а 56 проценти од испитаниците ја навеле Западна Европа како еден од трите најдобри региони за инвестиции.

Во Велика Британија се спровеле 1.054 инвестициски проекти во 2018 година, во Франција 1027, во Германија 973, 314 во Шпанија, Белгија 278, Полска 272, Турција 261, во Холандија 229, во Русија 211 и во Ирска 205.

Централна и Источна Европа е втор најатрактивен регион за странски директни инвестиции во светот, веднаш по Западна Европа, се наведува во студијата.

Успехот на земјите од Централна Европа и Источна Европа не е занемарлив, бидејќи овој регион пред само пет години беше на четвртото место по атрактивност за инвеститорите, се наведува во анкетата.

Странските директни инвестиции во Европа се намалиле во 2018 година за прв пат во последните шест години, и тоа за четири проценти, а биле спроведени 6.356 инвестициски проекти. Европскиот БДП го забавил растот на само 1,8 проценти минатата година, а на инвестициите влијаеле и странски фактори, како што е слаб раст на американски инвестиции во Европа, забавување на економскиот раст на Кина и Јапонија.

Анкетираните компании проценуваат дека атрактивноста на Европа за странските директни инвестиции најмногу го загрозува Брегзит, додека на второ место е политичката нестабилност во ЕУ, на трето е пораст на популизмот и протекционизмот и на четврто глобалната политичка неизвесност.

Кинескиот гигант Huawei продолжува со развојот на 5G мрежата во светот, а на големо незадоволство на Американците, нов клиент на оваа компанија е Русија.

Huawei потпиша договор со рускиот телекомуникациски гигант “MTS” за развој на 5G технологијата во Русија. Кинеската компанија би требала од следната година на просторот на Руската Федерација да ја развие 5G мрежата.

Договорот е постигнат на самиот почеток од тридневната посета на кинескиот претседател Си Џинпинг на Москва, во екот на големата блокада на кинеската компанија од страна на западните земји предводени од САД, кои што тврдат дека Huawei со своите технологии шпионира за кинеските власти.

 

Овој договор секако ќе биде големо олеснување за Huawei, компанија која во последните неколку месеци беше под интензивен меѓународен надзор и на удар на санкции.

Huawei стана главниот актер во американско-кинеската борба за власт која започна во трговијата и сега се одвива во технолошкиот сектор. САД ги охрабрија своите сојузници да го блокираат најголемиот светски производител на телекомуникациска опрема во развојот на 5G мрежата, тврдејќи дека кинеската влада би можела да ги користи своите производи за шпионажа.

Иако од Huawei во повеќе наврати ги демантираа тие обвинувања, тврдејќи дека компанијата нема никаква врска со кинеската влада, некои земји како Австралија и Нов Зеланд, веќе ја блокираа набавката на опремата на Huawei за нивната 5G мрежа.

 

Напорите на Вашингтон да ја блокираат кинеската компанија ескалираа минатиот месец кога администрацијата на Трамп ја стави компанијата на „црната листа“ која им забранува на американските компании да тргуваат со Huawei. Поради тоа, од Google соопштија дека ја прекинуваат соработката со Huawei што дефинитивно е тежок удар за кинеската компанија која доколку нешто не се промени, ќе остане без оперативниот систем „Андроид“.

САД и Кина во изминатата година водат жестока трговска војна со меѓусебно воведување на царини на стока вредна милијарди долари.

Германскиот Парламент го ратификуваше Протоколот за членство на Македонија во НАТО, но во текот на дебатата германските пратеници влезот на земјата во Алијансата го поврзаа со датумот за почеток на преговори со Европската Унија.

Иако расправата за извештајот на Европската комисија треба да се одржи на посебна седница, сепак некои од пратениците имаа забелешки дека таа расправа се оддолжува.

Владата на Германија во образложението на Протоколот од 6 февруари 2019 година изразува убеденост дека приклучувањето на Република Македонија кон НАТО ќе значи придонес кон безбедноста и стабилноста во евроатлантскиот простор, јави Дојче веле.

На ратификацијата на членството се спротивставија популистичката Алтернатива за Германија (АфД) и Левицата, јави Дојче веле. Петр Бистрон од АфД ѝ честиташе на земјата поради затворањето на Балканската рута за бегалците во 2016 година, но рече дека неговата партија ќе гласа против членството во НАТО затоа што има „голем проблем со корупцијата“, а „Балканот е само предградие на Европа“.

Александер Ној од Левицата се спротивстави на проширувањето на НАТО и ја критикуваше „прозападната Влада во Македонија дека погрешно го интерпретирала референдумот за промена на името“. Ној цело време во излагањето го користеше терминот „Македонија“ поради што влезе во судир со еден пратеник со грчко потекло во Бундестагот.

Германските пратеници, го поддржаа членството на земјава во НАТО, но имаа расправија поради оддолжувањето на расправата за почеток на преговорите на земјата со Унијата.

Пратеникот од опозициските Зелени, Јирген Тритин оцени дека околу почетокот на преговорите има судир и во самата влада.

-Канцеларката е против, а Министерството за надворешни работи се залага да започнат преговорите. Коалицијата не може да постигне согласност по ова прашање, изјави тој. ЦДУ на канцеларката Ангела Меркел и социјалдемократите од СДП, на кои им припаѓа министерот за надворешни работи Хајко Мас ја сочинуваат владината коалиција.

-Желбата на граѓаните на Северна Македонија не беше само да се биде дел од НАТО, туку и дел од обединета Европа, рече пратеникот на Зелените и додаде дека грчкиот премиер Алексис Ципрас ја жртвувал својата политичка кариера за да се постигне Преспанскиот договор и оти поради него ќе ја загуби власта на следните избори. Тој потсети дека ЕК донела јасна препорака за почеток на преговорите.

Пратеникот на Зелените од говорницата потсети и дека германското Министерство за надворешни работи уште на 8 мај годинава го информирало Бундестагот дека треба да се изјасни за почетокот на преговорите со Северна Македонија.

Двајца пратеници на ЦДУ, Кристијан Шмит и Петер Бејер реплицираа на забелешките на Тритин. Шмит оцени дека ставовите на Тритин немаат „врска со реалноста“ и ја пофали улогата на Северна Македонија на Балканот, нарекувајќи ја „упориште на мирот“, која секогаш помагала во најтешките моменти.

Според Шмит, стратешки интерес на Германија е земјите од Западниот Балкан да станат дел од ЕУ и најави дека за почетокот на преговорите со ЕУ ќе се разговара „наскоро“.

Шмит во излагањето рече дека Северна Македонија и Албанија треба во пакет да ги започнат преговорите, но потенцираше дека Албанија во моментов се соочува со „одредени проблеми“, поради што е потребно подолго време да се простудира извештајот на ЕК.

Колегата на Шмит од ЦДУ, Петер Бејер ги поздрави договорите со Грција и Бугарија, но критикуваше дека во земјата се потребни дополнителни напори во делот на борбата против организираниот криминал, корупцијата, правосудството и јавната администрација.

Социјалдемократот Карл-Хајнц Брунер го пофали компромисот со Грција кој, како што рече, „не треба само да се признае, туку и постојано да се фали“, и посочи дека со влезот во НАТО на „Северна Македонија не треба да ѝ се тргне морковот и за почеток на преговорите со ЕУ“.

-Оваа земја е во срцето на Европа и ги исполни сите услови за почеток на преговорите, рече Брунер.

Американските разузнавачки служби ги известиле властите од Вашингтон дека нивниот најголем сојузник на Блискиот исток, Саудиска Арабија повторно ја стартувала програмата за развој на балистички ракети, со помош на Кина.

Американските разузнавачи проценуваат дека стартувањето на програмат

а за развој на балистички ракети, всушност е пат кон поседување на нуклеарна бомба. Имено, Саудиска Арабија има долга соработка со Кина во врска со балистичките ракети, откако Кинезите во 1987-ма година на Саудијците им продадоа неколку балистички ракети од типот “DF-3” со домет од 2,800 километри. Се проценува дека таа бројка во меѓувреме пораснала на од 30 до 120 ракети.

Аналитичарите во САД и натаму веруваат дека Саудиска Арабија нема способност сама да развие балистички ракети со погон на течно гориво. Исто така, оваа земја од Блискиот исток е еден од најголемите купувачи на американско оружје, а пред две години Саудијците со администрацијата на Трамп потпишаа договор за набавка на оружје во вредност од 110 милијарди долари.

Сепак, треба да се истакне дека Саудиска Арабија има забрана од САД за купување на ракетна технологија, па затоа Вашингтон сето тоа го компензираше со продажба на врвно конвенционално оружје и борбени авиони.

Иран и нивната ракетна програма е тоа што најмногу ги загрижува властите од Ријад и Вашингтон, па затоа Ријад кога веќе не може таква технологија да набави од САД, се врти кон Кина.

„Без никакво сомнение, ако Иран развие нуклеарна бомба, ние ќе ја направиме што е можно поскоро“, изјави контроверзниот саудиски принц Мохамад Бин Салман во интервју минатата година.

На сателитските снимки напраавени во ноември минатата година, кои сега ѝ станаа достапни на јавноста, може да се види првата фабрика за балистички ракети во Саудиска Арабија која е лоцирана во постоечката ракетна база во близина на градот Ал Ватах.

Според експертите, фотографиите од фабриката во Саудиска Арабија откриле дека Саудијците користат кинеска технологија за развој на балистичките ракети.

Деновиве се појави аудио снимка на која може да се слушне коментарот на американскиот државен секретар Мајк Помпео во врска со ситуацијата во Венецуела.

Аудио снимката која ја објави “The Washington Post” била направена за време на неговиот состанок со еврејските лидери минатата седмица. Помпео на снимката открива некои интересни детали, но и фрустрации во врска со обидите да се сруши од власт претседателот на Венецуела, Николас Мадуро.

Помпео на снимката се жалел како САД не успеваат да ја обединат венецуеланската опозиција, најмногу поради тоа што е голем бројот на тие кои што сакаат да го наследат Мадуро откако ќе биде срушен од власт.

Американскиот државен секретар нагласува дека тоа не е ништо ново и станува збор за проблем со кој се занимава уште пред да биде државен секретар, односно уште додека бил шеф на американската разузнавачка агенција „ЦИА“.

„Од денот кога станав директор на „ЦИА“ тоа беше една од работите кои што Трамп сакаше да ги спроведе. Но, задачата се покажа ѓаволски тешка. Имено, сите во венецуеланскиот опозициски блок имаат сопствени интереси и сакаат да се борат за пленот, наместо да се фокусираат на заедничката цел – рушењето на Мадуро од власт“, вели Помпео.

„Во моментот кога Мадуро ќе биде тргнат од власт сите тие ќе подигнат рака и ќе речат: Земете ме мене, земете ме мене, јас сум новиот претседател. Ќе има повеќе од 40 луѓе кои сметаат дека имаат право да бидат претседател на Венецуела“, рекол Помпео на аудио снимката.

 

Очигледно, еден од обидите на Вашингтон да го реши тој „проблем“ бил изборот на „свој човек“, а тоа е Хуан Гваидо. Но, според овој коментар на Помпео, дури и Гваидо сега би имал проблеми доколку Мадуро биде срушен од власт, затоа што повторно многумина ќе сакаат да застанат на чело на државата.

Помпео меѓу другото открил дека САД се обиделе да ангажираат и разни религиски организации за да им помогнат: „Се обидуваме да поддржиме разни религиски институции кои треба да ни помогнат да ја собереме заедно целата опозиција“.

Според Помпео, со Мадуро управуваат властите од Куба, а тој воопшто не им верува на своите соработници во Венецуела: „Мадуро не им верува ниту на Венецуеланците. Не го обвинувам, не би ни требало да им верува. Сите прават завера против него, но тоа го правата не за доброто на државата, туку за лични интереси“.

Летните дискотеки во Градскиот парк ќе се уриваат и на нивно место ќе се наоѓа новиот забавен парк, објавува СДК.МК.

Според проектот, паркот ќе биде на површина од 26.000 метри квадратни, односно освен просторот на сегашниот луна парк, ќе се прошири и на местото на летните дискотеките. Поголема површина за новиот забавен парк како што објаснуваат од кабинетот на градоначалникот Шилегов е потребна бидејќи во него нема да има реквизити само за деца, туку и адреналински содржини за возрасни.

Како што најави Шилегов на презентацијата на проектот летово ќе почне постапката за проектирање и набавка на реквизитите, што значи на есен ќе се уриваат дискотеките.

Целата вест прочитајте ја на СДК.МК.

Претседателот на Русија, Владимир Путин, Требало да биде поканет на обележувањето на 75-годишнината од истоварувањето на Нормандија, таканаречен Ден Д, сметаат 80 проценти од испитаните Французи.

Во анкетата објавена на сајтот на весникот "Фигаро" учествувале околу 43.500 луѓе, а 81 процент од нив позитивно одговориле на прашањето дали Путин требало да биде поканет на церемонијата. Секој учесник можел само еднаш да одговори на прашањето. 

Шефот на руската дипломатија Сергеј Лавров, во средата изјавил дека францускиот повик на комеморацијата не подразбирал и доаѓање на делегација од Москва на тој настан.

 

Шефовите на државите и владите од 16 земји, вклучувајќи ја и Германија, биле повикани да учествуваат во настаните по повод истоварувањето во Нормандија.

Светските лидери се собрале вчера во Портсмут, на југот на Велика Британија, за да ја одбележат 75-годишнината од најголемата поморска инвазија во историјата, таканаречениот Ден Д.

Британската кралица Елизабета Втора и премиерката Тереза Меј им се приклучиле на американскиот претседател Доналд Трамп, францускиот претседател Емануел Макрон, германската канцеларка Ангела Меркел и многу други службеници.

 

 

Две години во Република Македонија не е изграден ниту еден метар нов пат. Градбата на нова инфраструктура е замрена. Нема проекти, нема инвестиции. Најголем потфат во областа на инфраструктурата на оваа власт беше играње чочек во тунел на автопат изграден од владата на ВМРО-ДПМНЕ, се вели во соопштенеито на опозициската партија.

Според ВМРО-ДПМНЕ, Зоран Заев и СДСМ излажаа кога на изборите во 2016 година ветуваа дека ќе изградат 600 километри нов автопат и 550 километри нови магистрални патишта.

,,Власта не само што не изгради ништо ново, туку и тоа кое што требаше да го пуштат во употреба останато од времето на ВМРО-ДПМНЕ не е пуштено во употреба, па така готовиот автопат Миладиновци – Штип со месеци е вон употреба од причини кои само Зоран Заев ги знае.

Иако капитални инвестиции нема, власта сепак без престан се задолжува. Каде отидоа над половина милијарда евра од нови задолжувања, а притоа ништо не е изградено е прашање на кое Зоран Заев и неговите министри ќе треба да им го одговорат на граѓаните, а и на институциите на систем кога ќе завладее правото во Република Македонија.

Најавуваа градежен бум, а не направија ништо. Владеењето на Зоран Заев ќе остане запаметено како време во кое ништо не е направено, градежните работи на инфраструктурата запреле, инвестиции немало , а граѓаните се повеќе се решавале да ја напуштат државата. Колку побргу владеењето на Заев стане минато, толку подобро за државата и граѓаните”, се вели во соопштението.

Администрацијата на американскиот претседател Доналд Трамп, испрати предупредување до сојузниците од Швајцарија да не ја користат технологијата на кинескиот гигант Huawei.

Американскиот државен секретар Мајк Помпео ја предупреди Швајцарија поради блиските бизнис односи со Кина, истакнувајќи дека оваа неутрална европска земја се изложува на прекршување на приватноста доколку ја прифати помошта на кинеските компании за изградба на нивната инфраструктура.

Според Американците, Швајцарија со користење на мобилната технологија и останатата опрема од најновите генерации на Huawei, ќе ѝ овозможи на Кина шпионирање на чувствителните комуникации и податоци.

 

„Швајцарците веќе подолго време ѝ даваат важност на заштитата на својата приватност. Но, ако ја користат кинеската технологија, тогаш сите податоци ѝ ги предаваат на Комунистичката партија на Кина. Нема приватност“, порача Помпео.

Кинеските мали и средни претпријатија под притисок на трговската војна со САД, ја разгледуваат можноста за преселување на производството во Русија.

Ова го потврди генералниот секретар на Кинеската асоцијација за развој на претпријатијата во странство, Хе Женвеј.

Кинеските експерти откриваат дека трговијата помеѓу САД и Кина во најголема мера се одвива во малиот и среден бизнис, додека пак билатералната трговија меѓу Кина и Русија најчесто се потпира на големите државни претпријатија.

„Меѓутоа, сега многу извозни мали и средни претпријатија се соочуваат со потешкотии. САД веќе ги подигнаа царините од 10% на 25%, што е еквивалентно на затворање на вратите. Ако американските потрошувачи се согласат од своите паричници да плаќаат повеќе, тие компании ќе ги зголемат цените на своите производи за 25%, што е малку веројатно“, изјави Женвеј.

Според неговите зборови, во едни такви услови, компаниите треба да се одржат на површината.

„Тие треба да размислат да тргнат кон Русија. Ние можеме да го префрлиме производството во Русија, од каде што повторно ќе можеме да ја продаваме стоката во Европа и САД“, заклучи Женвеј.

Последниот круг на американско-кинеските трговски преговори заврши кон средината на мај без резултати, поради уште едно зголемување на царините од страна на САД. Властите од Вашингтон ги зголемија царините од 10% на 25% на кинескиот увоз во вредност од околу 200 милијарди евра.

Американскиот претседател Доналд Трамп, исто така нареди и започнување на процес за зголемување на царините на преостанатиот увоз од Кина кој се проценува на околу 300 милијарди долари. Како одговор на тоа, Пекинг на 1-ви јуни ги зголеми царините на увоз на стока од САД во износ од 60 милијарди долари.

Top