(0 гласови)

Народната банка и Министерството за финансии координирано ги следат состојбите во економијата и потенцијалните ризици заради соодветно делување.

Денес беше одржана електронска седница на Комитетот за финансиска стабилност – меѓуинституционално тело за следење на состојбите во финансискиот систем во коешто членуваат претставници на двете институции. Со седницата претседаваше гувернерката, Анита Ангеловска-Бежоска, заедно со министерката за финансии, Нина Ангеловска.

Претставниците на Народната банка и на Министерството за финансии ја разгледаа состојбата во банкарскиот сектор, во контекст на актуелните услови со ширењето на вирусот ковид-19 (коронавирусот). Комитетот заклучи дека банкарскиот систем е стабилен. Банките продолжуваат со давање услуги на граѓаните и компаниите и се прудентни во своето работење. Информациите од теренот покажуваат дека банките се подготвени да работат и во актуелните вонредни околности и дека ги следат препораките за превенција.

На седницата беше нагласено дека е особено важно што последниот редовен квартален стрес-тест спроведен од Народната банка со податоци за 31 декември 2019 година ја потврдува стабилноста на банкарскиот систем и неговата отпорност на симулираните шокови.

Економските ефекти од вирусот сѐ уште се неизвесни на глобално и национално ниво и зависат од времетраењето и силината на овој неочекуван шок. Народната банка и Министерството за финансии постојано ги ажурираат информациите и вршат оцена на можните ефекти врз домашната економија, заради навремена процена на потребата од преземање соодветни мерки.

Како што беше нагласено и во рамки на седницата се очекува дека во текот на претстојните денови, Советот на Народната банка ќе донесе регулаторна измена со која ќе се олеснат условите за реструктурирање на кредитите на граѓаните и компаниите.

Претходно, на почетокот на неделава, Народната банка ја намали основната каматна стапка на 1,75, а потоа Советот на Народната банка донесе и неколку одлуки за регулаторни промени коишто придонесуваат за ублажување на потенцијалните неповолни ефекти врз економијата. Се очекува дека дел од нив ќе овозможат поголема кредитна поддршка и поповолни услови за компаниите коишто се погодени, бидејќи износот на новите или реструктурираните кредити одобрени на овие компании ќе претставува одбитна стапка од обврската за држење задолжителна резерва на банките кај Народната банка. Донесена е и одлука за одложена примена на некои регулаторни барања од банките за да се овозможи поголема посветеност на банките на давањето кредитна поддршка на стопанството и на населението.

(0 гласови)

Претседателот на САД, Доналд Трамп одобри нацрт закон со кој на американските граѓани им се овозможува бесплатно тестирање на коронавирусот.

Трамп во пишаното соопштение потврди дека го ратификувал нацртот под назив: „Прво семејството: Закон за борба против коронавирусот“.

Нацртот претходно беше усвоен во двата дома на Конгресот и стапи на сила. Треба да биде механизам за издвојување на 104 милијарди долари за борба против коронавирусот.

Властите во Вашингтон на тој начин сакаат да обезбедат бесплатно тестирање на Американците на вирусот, како и да им помогнат на социјално загрозените семејста. Исто така ќе биде овозможено и кофинансирање на боледувањето и неплатеното отсуство од работа во текот на мерките за превенција на ширењето на коронавирусот.

 

Најавена е и друга низа на мерки, вклучувајќи го и проширувањето на полисите за осигурување на невработените и испраќање на медицинска помош на сојузните држави.

Според последните податоци, во Соединетите Американски Држави се заразени 9,345 лица, а како последица на коронавирусот починаа 150 лица.

(0 гласови)

Пандемијата на коронавирусот има големи последици за австрискиот пазар на трудот и само во последните два дена се пријавени 49.000 нови невработени во Службата за вработување (АМС).

Од воведувањето ограничувања на слободата на движење, АМС доби 49.000 нови невработени, изјави за АПА, шефот на институцијата, Јоханес Копф.

Од нив 20.000 се од хотелскиот и угостителскиот сектор, 4.500 од градежништвото и 3.000 од секторот за изнајмување работна сила.

Во Австрија моментно има 399.359 невработени, според АМС.

(0 гласови)

Експериментот за сузбивање на ширењето на заразата со коронавирусот кој беше спроведен во малиот италијански град Во во регионот Венето се покажа како успешен.

На здравствените работници во овој италијански град тоа им успеа откако повеќе пати ги тестирале сите 3,300 жители, безразлика на тоа дали покажувале симптоми на болеста, или не. Кога ќе утврделе дека некој е позитивен на тестовите на коронавирусот, тогаш веднаш тоа лице, како и сите со кои бил во контакт биле ставани во карантин. Благодарение на ваквиот режим тие успеале целосно да го спречат ширењето на Covid-19 во градот.

Андреа Крисанти, експерт за заразни болести кој бил дел од тимот кој работел во Во ги повикува сите земји кои го ограничуваат тестирањето да го погледнат примерот од италијанскиот мал град и да започнат темелно да тестираат поголем број на граѓани.

Успехот на здравствените работници во овој италијански град укажува на важноста на тестирање и изолирањето на лицата кои би можеле да ја шират заразата, пристап кој го поддржува Светската здравствена организација.

 

Од СЗО веќе ги повикаа сите земји да започнат со „агресивно тестирање“, нагласувајќи дека со таквите методи Јужна Кореја и Тајван успеале да го спречат ширењето на коронавирусот.

Крисанти изјави дека овој необичен експеримент на научниците им овозможил да направат „целосна епидемиолошка слика“ на болеста. Тестирањето започнало на 22-ри февруари откако во градчето починале две лица како последица на коронавирусот. Тестовите покажале дека 3% од жителите се заразени, но и дека половина од носителите не прикажале никакви симптоми на заразата. После изолирањето на заразените, десет дена подоцна бил спроведен втор тест кој покажал дека степенот на заразеност на популацијата се намалил на 0,3%.

 

Во текот на вториот круг на тестирање биле идентификувани шест заразени лица кои немале никакви симптоми. Тоа значело дека и тие мора да бидат ставени во карантин: „Да не ги препознаевме, заразата ќе продолжеше да се шири“.

После овие резултати, властите на италијанскиот регион Венето сакаат да продолжат агресивно да го тестираат населението. Целта им е дневно да се земаат брисеви на 11 илјади луѓе: „Ако некој се јави на нашите специјални телефонски броеви и каже дека е болен, се тестираат сите членови на семејството на тоа лице, сите пријатели и сите кои што живеат во негова близина“, изјави Крисанте.

(0 гласови)

За прв пат од избивањето на епидемијата на коронавирусот од декември минатата година во кинески Вухан, не е забележан ниту еден нов случај.

Националната здравствена комисија пријави 34 нови случаи во регионот, но сите новозаразени во Кина пристигнале од странство. Кинеските власти соопштија дека досега во земјата биле заразени 81 илјади од кои 3 илјади починале.

Во меѓувреме, над 300 доктори за интензивна нега од Кина пристигнаа во Италија со цел да им помогнат на своите италијански колеги во лекувањето на пациентите. Заедно со нив пристигнаа и тони опрема – заштитни маски, респиратори и други медицински помагала.

Сепак, колку и да е великодушна и добредојдена кинеската помош, на Италија и остатокот на Европа тоа нема да им биде доволно, иако станува збор за земји со исклучително развиен здравствен систем.

Само на една привремена болница во Милано ѝ се потребени 500 доктори и околу 1,400 медицински сестри за грижа на 400 пациенти кои се на интензивна нега.

Вчера во Милано пристигна и група од 37 доктори и 20 тони медицинска опрема која ќе биде распределена во болниците ширум Ломбардија, подрачје во Италија кое е најмногу погодено од епидемијата на коронавирусот.

 

(0 гласови)

Претседателот Стево Пендаровски вечерва прогласи вонредна состојба во државата. Ваквата одлука е донесена, како што рече во обраќањето до граѓаните, за поефикасно справување со коронавирусот.

Вонредната состојба ќе трае 30 дена. Во тој период Владата до Пендаровски ќе треба да поднесе извештај за ефектите од донесените мерки за заштита против корона вирусот, дневно да го информира за преземените активности и за ажурираните планови за постапување во иднина.

Владата ќе продолжи да функционира како техничка.

– Предмалку ја потпишав одлуката за прогласување вонредна состојба на територијата на целата држава. Фактот што првпат од нашата независност поднесуваме вонредна состојба укажува колку е сложена состојбата во земјата. Изборите ќе мора да бидат одложени, а ќе се закажат дури кога за тоа ќе се создаде прилика, истакна Пендаровски во вонредното обраќање.

На граѓаните уште еднаш им порача да останат дома и да не патуваат надвор.

 

(0 гласови)

Државна Лотарија ги известува играчите на игрите на среќа, а особено добиниците на добивки вредни над 5 000 денари, дека Благајната на Државна Лотарија која се наоѓа во седиштето на друштвото, или поточно во зградата на МРТ , во Скопје, ќе биде отворена секој работен ден од 10 до 14 часот. Истото работно време ќе се однесува и на регионалната благајна во Кочани.

Потсетуваме дека рокот за исплата на добивките на Лото 7 и Џокер е 30 дена од објавувањето на официјалниот извештај, а исплатата на добивките од инстант лотаријата е 30 дена по завршувањето на продажбата на серијата од тој инстант лоз.

Исто така потсетуваме, дека одлична можност да ги одиграте вашите среќни броеви е ONLINE уплатата преку www.loto.mk која ја олеснува и исплатата на добивките директно на вашата сметка.

#СедиСиДома играј Лото ONLINE

Igraj OnLine 733x313px

(0 гласови)

Директорот на „Сбербанк“ се заложи за легализација на продажбата на алкохол преку интернет за да им се помогне на Русите кои поради коронавирусот се наоѓаат во изолација.

Герман Греф, извршниот директор на познатата руска банка, по враќањето од странство ја започна својата двонеделна изолација.

Тој за време на видеоконференцијата порача дека безрецептните лекови и алкохолот би требало да можат да се купуваат онлајн за да им се помогне на луѓето во самоизолација, а исто така, на тој начин би се избегнало и одењето во продавници и аптеки.

„Се надевам дека одлуката за тоа многу брзо ќе се донесе и дека луѓето нема да мора да одат во во продавници и аптеки“, изјави Греф.

 

Набрзо после апелот на првиот човек на „Сбербанк“, претседателот на Русија, Владимир Путин објави дека ќе се овозможи продажба на безрецептни лекови преку интернет, но алкохол не спомена.

Русија моментално има 114 случаи на заразени со коронавирус, а на странските државјани им е забранет влез во земјата.

Инаку, иако консумацијата на алкохол во Русија во изминатите години опадна, сепак забраната за купување на жестоки пијалоци и друг алкохол преку интернет во оваа земја и натаму е на сила.

(0 гласови)

Скијачкиот ресорт Ишгл во австриски Тирол, според пишувањата на австрискиот портал „Miss.at“, но и уште некои медиуми, е местото на кое околу сто или илјада луѓе се заразиле со коронавирусот, односно тој скијачки центар е епицентарот на инфекцијата Ковид-19 во Европа.

Како почнало сè?

Постојат сомнежи дека сè започнало од ски барот, каде што посетителите од различни места на светот се заразиле со коронавирусот. Тоа го потврдува информацијата од Данска, Шведска, а особено од Германија за новите позитивни пациенти на кои на сите им е една работа заедничка – наводно се вратиле од скијање на Ишгл. Откако се вратиле дома, почнале и самите тие да ја шират опасната зараза.

Тоа што е особено вознемирувачки е дека во целата оваа приказна има информација дека локалните власти во Ишгл биле предупредени многу претходно дека нивното подрачје е “зона на опасност“ и дека таму има сомнителни случаи, но и покрај тоа тие скијачите ги пуштале без никаков проблем или пак некаква контрола, а секојдневно доаѓале нови луѓе кои што не биле предупредувани од можната зараза.

 

Првото предупредување, веќе на 5-ти март дошло од Исланд. Исланд на 5-ти март ова подрачје го прогласил за зона на опасност и сите кои што оттаму се враќале во Исланд морале да поминат период од 14-дневна изолација. Во тој момент во Австрија имало 55 случаи на заразени од коронавирусот, а направени биле над 4.000 тестирања.

Како што наведуваат од австриските медиуми, првиот официјално заразен случај бил потврден на 6-ти март токму во Ишгл.

Меѓутоа, и покрај тоа, во ски центарот сè  продолжило да се одвива во вообичаен тек, со многубројни скијачи кои секојдневно се собирале по тамошните барови. Во текот на последната седмица од скијачката сезона никој во Ишгл не сакал да се откаже од својата заработка, ниту властите, но ниту рестораните и баровите, па сè  продолжило да тече по најнормален ред.

Сите податоци упатуваат на тоа дека првиот пациент заразен од коронавирусот во тамошниот ски центар бил од Норвешка кој што работел како келнер. На 9-ти март се појавиле и нови случаи на заразени луѓе поради што се очекувало тамошните барови да се затворат. Меѓутоа, скијањето и забавата продолжиле и во наредните денови.

Цел Тирол под карантин

Локалните власти продолжиле со несериозните постапки и ситуацијата продолжила да се одвива како дотогаш. Меѓутоа, сега австриските власти апелираат дека сите луѓе кои што биле на скијање во Ишгл од 28-ми февруари, мора задолжително да бидат во самоизолација како и сите оние кои што биле во контакт со нив.

Апелот се однесува на сите, без разлика дали имаат симптоми на вирусот или пак не.

(0 гласови)

Претседателката на Европската комисија, Урсула Фон Дер Лејен призна дека политичарите го потценија опсегот на опасноста која ја претставува пандемијата на коронавирусот.

„Мислам дека сите ние, ние кои не сме експерти, на почетокот го потценивме коронавирусот. Но, во меѓувреме стана јасно дека станува збор за вирус со кој ќе се занимаваме уште долго“, изјави Фон Дер Лејен за германски „Билд“.

„Сфативме дека тие мерки, кои уште пред две, три седмици изгледаа како драстични и драконски, мораа моментално да бидат донесени“, изјави шефицата на Европската комисија, потсетувајќи дека сега Европа е центарот на пандемијата.

Челниците на Европската унија вчера договорија 30 дневно ограничување за влез на надворешните граници на Унијата на странски државјани.

„Подготвени сме да преземеме се што е потребно и нема да се двоумиме за да воведеме дополнителни мерки во рамките на развојот на ситуацијата. Нашиот непријател е вирусот и мораме да направиме се за да ги заштитиме луѓето и економијата“, изјави Фон Дер Лејен по видео-конференцијата.

Таа меѓу другото порача дека не треба да се користи терминот „војна“ против вирусот, нешто што го кажа на почетокот на оваа седмица францускиот претседател Емануел Макрон: „Лично, не би го употребила зборот војна, но ја разбирам мотивацијата на францускиот претседател затоа што коронавирусот е загрижувачки противник“.

Top