На натпреварот со Фенербахче, утре во Скопје, на клупата на Вардар ќе биде Чеде Јаневски, откако и УЕФА го потврди како нов тренер на шампионот на Македонија.
После оставката на Гоце Седлоски, веднаш во Скопје пристигна како што вардаровите фанови го нарекуваат „вардарецот“ Јаневски.  Раководството на македонскиот првак беше во трка времето, за да успее да го протне Јаневски на списокот како нов тренер, а според потврдата на сајтот на УЕФА мисијата е успешна и поранешниот селектор на македонската репрезентација утре ќе биде крај аут-линијата и ќе диригира со играта на Вардар.

Официјалната промоција на Јаневски како тренер на Вардар ќе биде вечерва од 20 часот на задолжителната прес-конференција пред стартот на двомечот со Фенербахче. Утре се игра првиот меч во Скопје од 20 часот, а реваншот е во Истансбул за една недела.

Извор: Курир.мк

Винченцо Монтела со многу комплименти ја анализираше Шкендија, противникот на Милан во последната фаза пред пласман во групите во Европа Лигата. „Играат течно и убаво за око и имаат одлични напаѓачи", изјави Монтела на прес-конференцијата во Милано.

Шкендија ќе игра со големиот Милан, а убавите зборови од легенда каква што е Монтела им годат на тетовци.

„Тие имаат континуитет, бидејќи веќе одиграа три кола во квалификациите. Патем да не заборавиме дека во Милано пристигнаа осоколени по победата над првакот Вардар. Ми се допаѓа нивната игра, тактички се зрели, а имаат и талентирани играчи како Ибраими. Сепак се зависи од нас“, изјави Монтела.

Милан има одредени проблеми со офанзивниот дел, во моментов нема класа шпиц, иако тука се Нијанг; Сусо и Кутроне. 

Првиот дуел се игра утре на „Сан Сиро“ од 20,45 часот, а реваншот е во Скопје за една недела.

По оставката на Гоце Седлоски на тренерската функција во Вардар во црвено-црниот табор според неофицијални извори договориле соработка со легендата на најтрофејниот македонски клуб Чеде Јаневски кој последен пат работеше во Македонија како селектор на националниот тим. 

Јаневски во меѓувреме тренираше неколку клубови во Белгија и се очекува да ја преземе функцијата веднаш по дуелите на Вардар со Фенербахче во Лига Европа. Во меѓувреме на клупата ќе седи помошникот на Седлоски Александар Васоски.
 

Веројатно за многумина не ќе биде баш за верување, но тетовска Шкендија преку официјалните свои медиуми се одлучи да му се претстави на Милан, пред двете меѓусебни пресметки во Лигата на Европа, на специфичен начин преку интересно видео со хумористични елементи…

„Драг Милан, ние сме Шкендија“ – почнува видео пораката на ФК Шкендија со која сака да му се претстави на италијанскиот гигант, притоа надополнувајќи со сите интересни детали од градот кои компаративно се поврзуваат со Италија.

„Тетовците ја сакаат Моника Белучи, ама Италијанците се луди по тетовскиот актер Блерим Дестани! Капацитетот на вашиот стадион е 80.000, а нашиот град брои 100.000 жители. Вие испративте скаути да не гледаат откако се квалификувавме, а ние имаме скаути кои ве следат постојано… Вие ги украдовте нашите дресови од 1994 година, но нема да правиме проблем од тоа… И, додека вие одите до Кина по спонзор, нашиот главен спонзор е Еколог од Тетово – глобален лидер“ – се дел од пораките кои тетовци им ги испраќаат на „миланезите“ пред меѓусебните пресметки.

Фудбалскиот клуб Вардар промовираше двајца нови фудбалери кои доаѓаат надвор од стариот континент. Скопските „црвено црни“ се засилија со Итало Хозе Оливеира дос Сантош од Бразил и Мустафа Куајнoр од Гана.

Задача на 29-годишниот Итало ќе му биде да ги тресе противничките мрежи, додека 22-годишниот Ганец дејствува на средината од теренот. 

- Многу сум среќен сум што дојдов во Вардар и овој клуб за мене претставува нов предизвик во кариерата. Верувам дека брзо ќе се прилагодам на екипата и со нетрпение чекам да заиграм со моите нови соиграчи. Сега е на мене да почнам да тренирам со мојот нов тим и што побрзо да се подготвам за сезоната и да ги оправдам очекувањата од клубот. Пред да дојдам тука научив дека дека Вардар е најтрофејниот македонски тим и дека е три пати по ред шампион. Се надевам дека и во оваа сезона Вардар ќе успеее да ја одбрани титулата и повторно да биде шампион и да игра во Лигата на шампионите следната сезона. Исто така знам дека екипата игра во плеј-офот во Лигата на Европа против Фенербахче и се надевам дека Вардар ќе излезе како победник и ќе успее да помине во групната фаза“, порача новиот играч на „црвено-црните. - изјави Итало за официјалниот сајт на Вардар.

Двајцата фудбалери ќе бидат ставени веднаш во погон од тренерот Гоце Седлоски и ќе конкурираат за престојните предизвици на Вардар во Европа и македонскиот фудбалски шампионат.

19-годишниот Антониј Тентов не сака да зборува за „второто полувреме“ односно за искуството со органите на јавниот ред и мир кои констатирале прекршок и му изрекле глоба, туку само да ја раскаже својата верзија за сторијата што ја насловува како „најубавото нешто што ми се случило во животот“.

Во разговорот за „Дерби“ дознавме дека Антониј е успешен студент и тренира кошарка, како и дека не бил под дејство на алкохол или дрога, односно како што опишува во изјавата, бил понесен од адреналинот.

– Долго време планирав да направам нешто вакво, но немав соодветна можност. Суперкупот на УЕФА беше грандиозен настан и вистинска шанса да го остварам својот сон. Последните 20 минути од натпреварот имав енормен наплив на адреналин, нешто што не можам да го опишам со зборови. Тој адреналин кулминираше на самиот крај на натпреварот, па го погледнав теренот и се запрашав: „што ако можам да направам нешто што ќе го паметам цел живот, и јас, а и сите други присутни на „Телеком арена“? Скокот беше страшен, му благодарам на Бога што ме чуваше цела вечер. Верувајте не е лесно да се скокне од четири метри височина, на нерамна површина и преку жив ѕид од редари. Само што доскокнав, веднаш протрчав покрај редарите и влегов на теренот, вели Антониј.

Целата изјава прочитајте ја на Дерби.мк

Македонскиот фудбалски вицепрвак Шкендија ги одреди цените на билетите за дуелот против Милан, кој ќе се игра на 24 август во Скопје. Од таборот на тетовскиот тим пристигна информација дека цените ќе бидат поделени во четири блока.

Најевтиниот билет ќе чини 400 денари, а ќе има влезници што ќе чинат и 600 и 800 денари. Најскапата карта ќе се продава за цена од 1.000 денари и тоа се за центарлните трибини на Северната и Јужната трибина. 

Продажбата на билетите ќе започне вечерва, а ќе може да се купат на продажни места во Скопје, Тетово, Приштина и Тирана. 

 

Одлично замислена прослава на фудбалерите на Шкендија по триумфот со Тракаи од 3-0 и продорот во плеј офот од Лига Европа. Во соблекувалните на стадионот Младост во Струмица, малку сценарио и многу добро расположение. Роки Балбоа го одглуми искусниот Благоја Тодоровски.

Од Министерството за Внатрешни Работи соопштија дека било уапсено едно лице од Скопје за обид за препродажба на билети за денешниот натпревар на „Телеком Арена“ помеѓу Реал Мадрид и Манчестер Јунајтед.

Додека Скопје се подготвува за вечерашниот спектакл, многумина се уште се обидуваат да пронајдат билет повеќе, а има и такви кои што сакаат да заработат од препродажба на билети. 

Како што соопштија од Министерството за Внатрешни Работи на Македонија, синоќа бил уапсен 41-годишен жител на Скопје кој што на интернет објавил оглас за продажба на билет по цена од 600 евра за вечерашниот натпревар од европскиот Суперкуп.

Тој се обидел да продаде два билети, а со оглед на тоа што на интернет покрај огласот го оставил својот телефонски број, тој бил веднаш лоциран од службите кои што го привеле, а како докази му ги одзеле компјутерот, телефонот и сим-картичките.

Собранието на Република Македонија неодамна ги донесе предложените измени на кривичниот законик според кој се воведуваат санкции за фалсификување и нелегално продавање билети за европскиот Суперкуп.

Манчестер Јунајтед и Реал Мадрид ќе го одиграат одлучувачкиот натпревар во неподнослива жештина, пишуваат светските медиуми.

Манчестер Јунајтед слетуваат на Балканот токму за време на топлотен бран кој ја погоди Македонија, со температурата во Скопје над 40 степени Целзиусови. 

 

Условите нема да бидат погодни за играчите на Мурињо и Зинедин Зидан за време на натпреварот во вторник, со температурите кои се предвидува дека нема да се симнат под 35 степени. 

Јунајтед и Реал одиграа натпревари во неподнослива жештина на нивните неодамнешни предсезонски турени во САД, вклучувајќи го и натпреварот меѓу овие два тима во Санта Клара, но високите температури и топлотниот бран во главниот град на Македонија најверојатно ќе биде најжешкиот натпревар кој ќе мораат да го издржат. 

Предупредувања од здравството стигнуваат од сите делови на Јужна Европа каде што температурите - највисоки до сега во изминатите неколку децении - постигнуваат потенцијално опасни нивоа. 

Top